O‘zbekistonda bog‘chaga shakllangan yo‘llanmani olishga endi Davlat xizmatlari markaziga borish shart bo‘lmaydi. Bu haqda Adliya vazirligi matbuot xizmati xabar berdi.
Ma’lum qilinishicha, vazirlik Maktabgacha taʼlim agentligi va Raqamli texnologiyalar vazirligi birgalikda fuqarolarga qulaylik yaratish maqsadida yana bir byurokratiyaga chek qo‘ydi.
Bugungi kunga qadar bolalarni bog‘chaga joylashtirish uchun yo‘llanmani Davlat xizmatlari markazidan (agar markaz orqali yuborilgan bo‘lsa) olish lozim edi. Yangi tartibga ko‘ra, yo‘llanma shakllanishi bilan SMS xabar orqali ariza raqami va maxfiy kod yuboriladi. Ushbu maxfiy kod bilan to‘g‘ridan to‘g‘ri bog‘chaga borish va bu haqda mudiraga aytish kifoya.
“Asosiysi, sizga shakllangan yo‘llanmani tasdiqlovchi maxfiy kodi MTM mudirasiga aytilmaguncha u yo‘llanmani ko‘ra olmaydi va bu bilan korrupsiya holatlari oldi olinadi”, — deyiladi xabarda.
Qayd etilishicha, birgina 2022-yilning o‘zida bog‘chaga joylashtirish uchun 1 405 424 ta, 2023-yilning 9 oyi mobaynida esa 1 022 065 ta yo‘llanma shakllangan. Yangi qulaylik orqali fuqarolarning nafaqat vaqti, balki har yili 1,2 milliondan ortiq (6 tonna) qog‘oz tejalishiga erishiladi.
Izoh (0)