Ўзбекистонда боғчага шаклланган йўлланмани олишга энди Давлат хизматлари марказига бориш шарт бўлмайди. Бу ҳақда Адлия вазирлиги матбуот хизмати хабар берди.
Маълум қилинишича, вазирлик Мактабгача таълим агентлиги ва Рақамли технологиялар вазирлиги биргаликда фуқароларга қулайлик яратиш мақсадида яна бир бюрократияга чек қўйди.
Бугунги кунга қадар болаларни боғчага жойлаштириш учун йўлланмани Давлат хизматлари марказидан (агар марказ орқали юборилган бўлса) олиш лозим эди. Янги тартибга кўра, йўлланма шаклланиши билан SMS хабар орқали ариза рақами ва махфий код юборилади. Ушбу махфий код билан тўғридан тўғри боғчага бориш ва бу ҳақда мудирага айтиш кифоя.
“Асосийси, сизга шаклланган йўлланмани тасдиқловчи махфий коди МТМ мудирасига айтилмагунча у йўлланмани кўра олмайди ва бу билан коррупция ҳолатлари олди олинади”, — дейилади хабарда.
Қайд этилишича, биргина 2022 йилнинг ўзида боғчага жойлаштириш учун 1 405 424 та, 2023 йилнинг 9 ойи мобайнида эса 1 022 065 та йўлланма шаклланган. Янги қулайлик орқали фуқароларнинг нафақат вақти, балки ҳар йили 1,2 миллиондан ортиқ (6 тонна) қоғоз тежалишига эришилади.
Изоҳ (0)