Xorazm viloyatining Qo‘shko‘pir tumanida o‘quvchilar sholi dalasida ishlashga majburlangani haqida xabar berilgan edi. Senat huzuridagi Odam savdosiga va majburiy mehnatga qarshi kurashish milliy komissiyasi mazkur holat yuzasidan o‘rganish natijalarini e’lon qildi.
O‘rganish davomida Qo‘shko‘pir tumanidagi 19-maktabning 9-“A”sinfi bir guruh o‘quvchilari, ularning ota-onalari, maktab ma’muriyati va fermer xo‘jaligi rahbari bilan suhbat o‘tkazildi.
Suhbat davomida bir guruh o‘quvchilar tumandagi “Durdona” mahallasida joylashgan “Ibrohim baliqchi” fermer xo‘jaligiga tegishli sholi dalasida dars mashg‘ulotlaridan so‘ng, ushbu xo‘jalik rahbarining taklifiga asosan, ma’lum bir haq evaziga dalada o‘rilgan sholini to‘plash ishlarini bajarishga jalb qilingani aniqlandi.
Maktab ma’muriyatining ushbu o‘quvchilarni sholi o‘rimiga majburiy jalb qilinishi holati esa o‘z tasdig‘ini topmadi.
Aniqlangan qonunbuzilishlar yuzasidan Qo‘shko‘pir tumani “Ibrohim baliqchi” fermer xo‘jaligi rahbari tomonidan voyaga yetmagan shaxslarga nisbatan mehnat qonunchiligi va bolalar mehnatidan ularning sog‘lig‘iga, xavfsizligiga yoki axloq-odobiga ziyon yetkazishi mumkin bo‘lgan ishlarda foydalanganligi holati Qo‘shko‘pir tuman sudida ko‘rib chiqildi.
Sud qarori bilan fermerga Ma’muriy javobgarlik to‘g‘risidagi kodeksning 49-moddasi 3-qismi va 491-moddasida nazarda tutilgan huquqbuzarliklarni sodir etganlikda aybli deb topilib, unga nisbatan BHMning 10 barobari (3,3 million so‘m) miqdorida jarima jazosi tayinlandi.
Izoh (0)