Farg‘ona viloyatining Farg‘ona tumani “Vodil” aholi punktida xodimlarga qarshilik qilgan ikki fuqaroga nisbatan qurol qo‘llangani haqida xabar berilgandi. Chegara qo‘shinlari axborot xizmati holat sababini ochiqladi.
Maʼlum qilinishicha, “Bo‘ston” MFYdan o‘tuvchi yo‘lga o‘rnatilgan postda harbiy xizmatchilar o‘z vazifasini bajarayotgan vaqtda ushbu hududda harakatlanib kelayotgan mashina ko‘rikdan o‘tkazish maqsadida to‘xtatilgan va mashinaning salon qismida noqonuniy ravishda olib kelingan tovarlar borligi aniqlangach, holatga oydinlik kiritish bo‘yicha ikki nafar fuqaro Chegara qo‘shinlari bo‘linmasiga borishga taklif etilgan.
Biroq fuqarolar xizmatchilarning talablariga faol qarshilik ko‘rsatib, voqea joyidan yashirinishga uringan. Aynan shu vaqtda nazorat punkti yaqinida yig‘ilgan ularning sheriklari spirtli ichimlik taʼsirida harbiy xizmatchilarning qonuniy talablariga bo‘ysunmagan va faol qarshilik ko‘rsatib, kuch ishlatishi oqibatida harbiy xizmatchilar turli ko‘rinishdagi tan jarohatlari olgan. Kuchlar teng kelmagani bois xizmatchilar fuqarolarning noqonuniy harakatlarini to‘xtatish maqsadida Davlat chegarasi to‘g‘risidagi qonunning 64-moddasiga amal qilgan holda ogohlantiruvchi o‘q uzgan. Bunga qaramasdan, ular g‘ayriqonuniy harakatlarni davom ettirgan.
Ogohlantirishdan to‘g‘ri xulosa qilmay, xizmatchilarga qarshilik ko‘rsatishda davom etgan fuqarolarning ikki nafari qurol qo‘llanishi natijasida vafot etgan. Tegishli huquq idoralar tomonidan tekshiruv ishlari olib borilmoqda.
Izoh (0)