Chet eldagi vatandoshlarimiz, ularning hayot yo‘li, erishgan muvaffaqiyatlari haqida hikoya qiluvchi, shuningdek, barcha o‘zbekistonliklarni bir yerga jamlash maqsadida yaratilgan Uzbekistan’s Club global platformasi yana bir katta loyihaga qo‘l urdi.
Endilikda Uzbekistan’s Club jamoasi xorijda ta’lim olayotgan o‘zbekistonlik talabalar hayotini ham qamrab oladi.
Shu maqsadda tashkil qilingan O‘zbekistonlik.Students loyihasi aksariyat yoshlarni qiziqtirayotgan mavzu: qanday qilib dunyoning eng nufuzli universitetlariga o‘z kuchi bilan o‘qishga kirish mumkin, qayerda o‘qisa bo‘ladi, imtihonlar qanday topshiriladi, chegaraning narigi tomonida talabalarni nimalar kutyapti, stipendiya olish va yashash uchun pul to‘pish yo‘llari qanday, kabi savollarga to‘g‘ridan to‘g‘ri shu yo‘lni bosib o‘tgan xorijdagi talabalardan javoblar olishadi.
Bunday o‘ziga xos va ta’sirchan kontent yoshlarga motivatsiya ulashib, ularning kelgusi muvaffaqiyatlarida yo‘lchi yulduz bo‘lib xizmat qiladi, albatta.
O‘zbekistonlik.Students yangi hujjatli filmi qahramonlari o‘z tengdoshlariga xorijda talaba bo‘lish yo‘lida boshdan kechirganlari, o‘z tajribalari haqida so‘zlab berishadi. Filmning birinchi qismi premyerasi 16-sentabr kuni soat 18:00 da My5 telekanali va Uzbekistan’s Club’ning YouTube kanalida bo‘lib o‘tdi.
Premyera epizodida tomoshabinlar Oksford universiteti talabasi Mushtariy Madrahimova va East London Universiteti talabasi Аzizbek Аhmadjonov hikoyalariga guvoh bo‘lishadi. Ular qanday qilib Buyuk Britaniyaning eng yaxshi universitetlariga bepul o‘qishga kirib, stipendiya olishga erishganlari haqida, shuningdek, o‘z sirlari bilan bo‘lishishadi.
O‘zbekistonlik.Students shousining bosh g‘oyasi — O‘zbekiston yoshlariga xorijda o‘qish bilan bog‘liq real imkoniyatlar haqida aytib berish, shuningdek, mashaqqat bilan o‘qigan va ishlaganlar dunyoning eng yaxshi OTMlarini zabt eta olishini, agar maqsad aniq bo‘lsa, yo‘lning oxirida sizni doimo muvaffaqiyat kutib turishini ko‘rsatishdan iborat. Yana bir jihat, shou qahramonlari sifatida faqatgina o‘zining mehnatkashligi va tirishqoqligi bilan o‘qishga kirishga erishgan talabalar tanlangan.
Qayd etish joiz, serial bosh homiylari — Ucell uyali aloqa operatori va Turin Politexnika universiteti. Loyiha “qanotlari” — Uzbekistan Airways milliy aviakompaniyasi. Loyiha O‘zbekiston Respublikasi Yoshlari ishlari agentligi va Tashqi ishlar vazirligi tomonidan qo‘llab-quvvatlandi.
Eslatib o‘tamiz, serial “O‘zbekistonlik” filmlari seriyasi va shu nomdagi xalqaro forumlar orqali tanish bo‘lgan Uzbekistan’s Club ijodiy jamoasi tomonidan suratga olindi. Shou boshlovchilari — taniqli blogerlar Husnora Shodiyeva va Timur Аlixonov. Rejissor — Rustam Meliyev.
Izoh (0)