Armaniston prezidenti Vaagn Xachaturyan Xalqaro jinoiy sud nizomi bo‘lgan Rim statutini ratifikatsiya qilish to‘g‘risidagi qonunni imzoladi, deb xabar bermoqda Armaniston prezidenti sayti. Xachaturyan Armaniston XJSning vakolatlarini tan olishi haqidagi bayonotni ham qabul qildi.
Armaniston 1998-yilda Rim statutini imzolagan, biroq hujjat Armaniston konstitutsiyasiga zid deb topilgach, ratifikatsiya jarayoni 2004-yilda to‘xtatilgan. 2022-yil oxirida Armaniston hukumati ratifikatsiya jarayonini tikladi.
Rossiya Armanistonning hujjatni ratifikatsiya qilishiga faol qarshilik ko‘rsatdi, chunki XJS 2023-yil mart oyida Rossiya prezidenti Vladimir Putinni hibsga olish uchun order bergan. U Ukrainaning bosib olingan hududlaridan bolalarni Rossiyaga noqonuniy ravishda deportatsiya qilganlikda gumonlanmoqda.
Armaniston hukumati xavfsizlik masalalari bo‘yicha Rim statutini ratifikatsiya qilish zarurligini asoslab berdi:
“Mamlakatimizga qarshi urush jinoyatlari sodir etilgan va qilinmoqda. Bu bizga (ratifikatsiya) kerak, mamlakatimizga kerak”, — degandi parlament spikeri Alyon Simonyan sentyabr boshida.
Armaniston rasmiylari ratifikatsiya Ozarbayjon rahbariyatini Qorabog‘dagi ehtimoliy harbiy jinoyatlar uchun Xalqaro jinoiy sudda javobgarlikka tortish imkonini berishini ta’kidladi. Avvalroq Armaniston parlamenti spikeri o‘rinbosari Akop Arshakyan mamlakat rasmiylari Putinni hibsga olmoqchi emasligini aytgandi.
13-oktyabr kuni Rossiya prezidenti Vladimir Putin xalqaro hibsga olish orderi chiqqanidan keyin birinchi marta xorijiy davlatga tashrif buyurdi – u Qirg‘izistonga keldi, u yerda MDH Davlat rahbarlari kengashining yig‘ilishi bo‘lib o‘tdi. Jurnalistlar bilan suhbat chog‘ida Putin xorijga borishni hali rejalashtirmayotganini, biroq Armanistonga kelishga tayyorligini aytdi.
Izoh (0)