Арманистон президенти Ваагн Хачатурян Халқаро жиноий суд низоми бўлган Рим статутини ратификация қилиш тўғрисидаги қонунни имзолади, деб хабар бермоқда Арманистон президенти сайти. Хачатурян Арманистон ХЖСнинг ваколатларини тан олиши ҳақидаги баёнотни ҳам қабул қилди.
Арманистон 1998 йилда Рим статутини имзолаган, бироқ ҳужжат Арманистон конституциясига зид деб топилгач, ратификация жараёни 2004 йилда тўхтатилган. 2022 йил охирида Арманистон ҳукумати ратификация жараёнини тиклади.
Россия Арманистоннинг ҳужжатни ратификация қилишига фаол қаршилик кўрсатди, чунки ХЖС 2023 йил март ойида Россия президенти Владимир Путинни ҳибсга олиш учун ордер берган. У Украинанинг босиб олинган ҳудудларидан болаларни Россияга ноқонуний равишда депортация қилганликда гумонланмоқда.
Арманистон ҳукумати хавфсизлик масалалари бўйича Рим статутини ратификация қилиш зарурлигини асослаб берди:
“Мамлакатимизга қарши уруш жиноятлари содир этилган ва қилинмоқда. Бу бизга (ратификация) керак, мамлакатимизга керак”, — деганди парламент спикери Алён Симонян сентябрь бошида.
Арманистон расмийлари ратификация Озарбайжон раҳбариятини Қорабоғдаги эҳтимолий ҳарбий жиноятлар учун Халқаро жиноий судда жавобгарликка тортиш имконини беришини таъкидлади. Аввалроқ Арманистон парламенти спикери ўринбосари Акоп Аршакян мамлакат расмийлари Путинни ҳибсга олмоқчи эмаслигини айтганди.
13 октябрь куни Россия президенти Владимир Путин халқаро ҳибсга олиш ордери чиққанидан кейин биринчи марта хорижий давлатга ташриф буюрди – у Қирғизистонга келди, у ерда МДҲ Давлат раҳбарлари кенгашининг йиғилиши бўлиб ўтди. Журналистлар билан суҳбат чоғида Путин хорижга боришни ҳали режалаштирмаётганини, бироқ Арманистонга келишга тайёрлигини айтди.
Изоҳ (0)