EXEED kompaniyasi tomonidan o‘zbekistonlik jurnalist va blogerlar uchun Xitoyga media–tur tashkil etildi. Bu haqda “Daryo” muxbiri xabar bermoqda.
Ishtirokchilar dastlab Sindao shahrida joylashgan, aqlli texnologiyalar asosida barpo etilgan Super Intelligent Factory zavodiga tashrif buyurdi.
Ayni paytda zavodda EXEED avtomobillarining to‘rtta — LX, VX, TXL, RX modellari ishlab chiqarilmoqda. Yaqin kelajakda E03 va EOY rusumli yangi elektromobillar hamda gibrid avtomobillar ishlab chiqarish yo‘lga qo‘yiladi.
“Hozirda zavodimizda yiliga 50 mingta avtomobil ishlab chiqarilmoqda. Kelgusida bu ko‘rsatkichni 200 mingtaga yetkazish rejalashtirilgan”, — deydi EXEED Uzbekistan direktor o‘rinbosari Guo Yan Lan.
Super Intelligent Factory faoliyati 2022-yilda yo‘lga qo‘yilgan. Zavod avtomobil dizaynidan tortib uni ishlab chiqarishgacha bo‘lgan jarayonni qamragan. Xususan, inshoot shtamplash, payvandlash, bo‘yash va umumiy yig‘ish, R&D markazi, sinov va tekshirish obyektlarini o‘z ichiga oladi.
Payvandlash ustaxonasiga dunyodagi eng ilg‘or AI sifat nazorati tizimi o‘rnatilgan bo‘lib, ishlab chiqarish liniyasi 350 ta robot bilan jihozlangan. Avtomobil ishlab chiqarish jarayonining 90 foizini AI robotlari bajaradi. Zamonaviy texnologiyalar asosida qurilgan zavodda har 90 soniyada bitta avtomobil ishlab chiqariladi.
Bo‘yash ustaxonasi dunyodagi yetakchi “nol uglerodli” aqlli ishlab chiqarish, energiya tejovchi va atrof-muhitni muhofaza qilish bo‘yicha yangi texnologiyaga ega. Asosiy jarayonlar to‘liq avtomatlashtirilgan tarzda kechadi.
Inshootlar ustki qismiga quyosh panellari o‘rnatilgan va ular yiliga 14 million kVt/soat elektr energiyasi ishlab chiqaradi hamda zavod sarflaydigan elektrning 34,7 foizini qoplaydi.
Media–tur ishtirokchilari zavodning shtamplash, payvandlash va umumiy yig‘ish jarayonlari bilan tanishtirildi.
Shu bilan birga, tayyor avtomobillar test-drayvi ham o‘tkazildi.
O‘zbekistonlik tadbirkor Ulug‘bek Madumarov ham EXEED mijozi sifatida media–turda ishtirok etmoqda. Uning aytishicha, ikkita EXEED avtomobili xarid qilgan.
“Avtomobil sotib olishdan avval turli rusumdagi mashinalarni bir oy davomida o‘rgandim. Narxi, ot kuchi, sarf–xarajatlari va albatta to‘lovdan keyin qancha vaqtda olish mumkinligini taqqosladim. Keyin EXEEDni tanladim. Chunki u menga har tomonlama maʼqul keldi. To‘lov qilishim bilan avtomobilimni navbatsiz berishdi. Sifati narxiga juda mos keladi. Hozir Xitoydagi zavodga kelib, EXEEDning yangi RX modelini ko‘rdik. Unga yangi funksiyalar qo‘shilgan. Masalan, o‘rindiqlarida massaj bor ekan, konditsioneri ham noodatiy, saloni ham ajoyib”, — dedi u.
Kompaniya vakillarining maʼlum qilishlaricha, EXEED avtomobillari dunyoning 80 ta mamlakat va mintaqalariga eksport qilinadi. Kompaniya hamkorlari Yevropa, yaqin sharq, Markaziy Osiyo davlatlari hamda Shimoliy Amerika hisoblanadi.
EXEED bundan to‘rt oy oldin O‘zbekiston bozoriga ham kirib kelgan. Hozirgi kunda respublikada avtomobillarning LX, VX, TXL modellari sotilmoqda.
Kompaniyaning Toshkent shahrida ikkita, Urganch va Farg‘onada bittadan savdo markazlari mavjud.
Joriy yil oxirigacha mamlakatda yana 10 ta savdo markazi ochilishi rejalashtirilgan. 2024-yilda yangi rusumdagi EXEED RX ham O‘zbekiston bozoriga kirib keladi.
Ayni paytda EXEED kompaniyasi tashkil etgan media–tur davom etmoqda. Tashrif dasturidan kompaniya tomonidan uyushtiriladigan anjumanlar ham o‘rin olgan.
Izoh (0)