Hindistonning Uttar-Pradesh shtati O‘zbekistonda 65 bolaning o‘limiga sababchi bo‘lgan yo‘talga qarshi sirop ishlab chiqaruvchi Marion Biotech zavodi qayta ochishga ruxsat berilishidan oldin “tuzatish va profilaktika choralari” haqida hisobot topshirishi kerakligini ma’lum qildi.
Bu bayonot 11-oktyabr kuni Reuters agentligi zavodni qayta ishga tushirish haqidagi kompaniyaning murojaati qisman qabul qilingani haqida xabar berganidan so‘ng yangradi.
Shtatning dorilar bo‘yicha davlat nazoratchisining bayonotida ma’lum qilinishicha, kompaniya o‘limga olib kelgan yo‘tal siropi bilan bog‘liq bo‘lmagan mahsulotlarni ishlab chiqarish va sotishni qayta tiklashi mumkin, ammo bu bo‘yicha aniq muddat aytilmagan.
Nazoratchi Shashi Moxan Gupta Reuters agentligining xabarida keltirilgan ma’lumotlar noto‘g‘ri ekanligini va Uttar-Pradesh shtati Marion Biotech kompaniyasidan kamchiliklar bartaraf etilgani haqida hisobotni topshirishni so‘raganini aytdi.
Bu hisobot federal va shtatning dorilarni nazorat qiluvchi organlari inspektorlari guruhi tomonidan tekshirilishi kerak, dedi u bayonotda.
“Kompaniya apellyatsiya organining yakuniy qaroriga qadar hech qanday dori ishlab chiqarish ishlarini olib bormaydi”, — dedi Gupta.
Marion Biotech Jahon sog‘liqni saqlash tashkiloti va boshqa idoralarning xulosasiga ko‘ra o‘tgan yilning o‘rtalaridan buyon O‘zbekiston, Gambiya va Kamerunda 141 bolaning o‘limiga sabab bo‘lgan yo‘tal siroplarini ishlab chiqargan Hindistonning uchta kompaniyasidan biri.
O‘zbekiston Marion Biotech kompaniyasining “Ambronol” va “Dok-1 Maks” siroplarida qabul qilib bo‘lmaydigan darajada dietilenglikol va etilenglikol toksin moddalari borligini ma’lum qilganidan keyin kompaniya ishlab chiqarishi o‘tgan yilning 27-dekabrida to‘xtatgan edi.
Yanvar oyida Hindiston hukumati laboratoriyasi tomonidan o‘tkazilgan testlar davomida Marion Biotech tomonidan ishlab chiqarilgan siroplarning 22 namunasi soxtalashtirilgani aniqlagandi.
“Dok-1 Maks” siropi bo‘yicha O‘zbekistonda boshlangan sud ishining 11-oktyabr kuni bo‘lib o‘tgan majlisida Farmatsevtika tarmog‘ini rivojlantirish agentligining sobiq rahbari, sudlanuvchi S.K. va uning advokatlariga tergov organi tergovchisi tomonidan bosim o‘tkazilayotgani ma’lum qilingandi.
Izoh (0)