Ҳиндистоннинг Уттар-Прадеш штати Ўзбекистонда 65 боланинг ўлимига сабабчи бўлган йўталга қарши сироп ишлаб чиқарувчи Marion Biotech заводи қайта очишга рухсат берилишидан олдин “тузатиш ва профилактика чоралари” ҳақида ҳисобот топшириши кераклигини маълум қилди.
Бу баёнот 11-октябр куни Reuters агентлиги заводни қайта ишга тушириш ҳақидаги компаниянинг мурожаати қисман қабул қилингани ҳақида хабар берганидан сўнг янгради.
Штатнинг дорилар бўйича давлат назоратчисининг баёнотида маълум қилинишича, компания ўлимга олиб келган йўтал сиропи билан боғлиқ бўлмаган маҳсулотларни ишлаб чиқариш ва сотишни қайта тиклаши мумкин, аммо бу бўйича аниқ муддат айтилмаган.
Назоратчи Шаши Мохан Гупта Reuters агентлигининг хабарида келтирилган маълумотлар нотўғри эканлигини ва Уттар-Прадеш штати Marion Biotech компаниясидан камчиликлар бартараф этилгани ҳақида ҳисоботни топширишни сўраганини айтди.
Бу ҳисобот федерал ва штатнинг дориларни назорат қилувчи органлари инспекторлари гуруҳи томонидан текширилиши керак, деди у баёнотда.
“Компания апелляция органининг якуний қарорига қадар ҳеч қандай дори ишлаб чиқариш ишларини олиб бормайди”, — деди Гупта.
Marion Biotech Жаҳон соғлиқни сақлаш ташкилоти ва бошқа идораларнинг хулосасига кўра ўтган йилнинг ўрталаридан буён Ўзбекистон, Гамбия ва Камерунда 141 боланинг ўлимига сабаб бўлган йўтал сиропларини ишлаб чиқарган Ҳиндистоннинг учта компаниясидан бири.
Ўзбекистон Marion Biotech компаниясининг “Амбронол” ва “Док-1 Макс” сиропларида қабул қилиб бўлмайдиган даражада диэтиленгликол ва этиленгликол токсин моддалари борлигини маълум қилганидан кейин компания ишлаб чиқариши ўтган йилнинг 27 декабрида тўхтатган эди.
Январь ойида Ҳиндистон ҳукумати лабораторияси томонидан ўтказилган тестлар давомида Marion Biotech томонидан ишлаб чиқарилган сиропларнинг 22 намунаси сохталаштирилгани аниқлаганди.
“Док-1 Макс” сиропи бўйича Ўзбекистонда бошланган суд ишининг 11-октябр куни бўлиб ўтган мажлисида Фармацевтика тармоғини ривожлантириш агентлигининг собиқ раҳбари, судланувчи С.К. ва унинг адвокатларига тергов органи терговчиси томонидан босим ўтказилаётгани маълум қилинганди.
Изоҳ (0)