Isroilning Sderot shahri meri aholini evakuatsiya qilishga chaqirdi

Isroilning Sderot shahri meri Alon Davidi bosh vazir Benyamin Netanyaxuga murojaat qilib, shahar aholisini evakuatsiya qilishni so‘radi.

Mazkur hudud 12-oktyabr, payshanba kuni ertalab Falastinning HAMAS harakati tomonidan o‘qqa tutilgan va bir necha kishi yaralangan.

“Hukumat rahbari, armiyamiz o‘z jangovar topshiriqlarini bexatar bajara olishi uchun shaharng barcha aholisi Sderotdan olib chiqilishi kerak... Odamlar bu yerda 20 yildan beri yashab kelmoqda, ular evakuatsiya qilinishga loyiq”, — dedi Davidi o‘z bayonotida.

Sderot — Isroil janubidagi kichik shahar, Ashkelondan 15 km uzoqlikda joylashgan. Aholisi 30 ming kishidan oshadi. 9-oktabr kuni Isroil harbiylari Sderotda qurollangan shaxslarni aniqlash uchun “tozalash” operatsiyasini o‘tkazdi. O‘shanda aholini evakuatsiya qilish haqida e’lon qilinmagandi.

Payshanba kuni ertalab Falastin kuchlari to‘qqiz soatlik tanaffusdan so‘ng Isroil janubini o‘qqa tuta boshladi. Isroil va HAMAS o‘rtasidagi urush 7-oktyabrdan beri davom etmoqda. Har ikki tomondan minglab odamlar halok bo‘lgani xabar qilinmoqda.