Toshkent metropoliteni oxirgi vaqtlarda metrodan foydalanuvchi yo‘lovchilar soni oshib ketgani sabab murojaat bilan chiqdi.
Qayd etilishicha, sentyabr oyidan boshlab metropolitendan foydalanuvchi yo‘lovchilar soni o‘tgan yilga nisbatan mutanosib ravishda kuniga 200 mingdan ortishi kuzatilgan. Hozirgi vaqtda bir kunda o‘rta hisobda metropolitendan foydalanuvchi yo‘lovchilar soni 690-700 mingni tashkil etmoqda.
“Ayniqsa, 20-sentyabr sanasidan boshlab ko‘chalarda 10 ballik avtomashina tiqilinchligi sababli avtobuslardagi yo‘lovchilarning bir qismi metrodan foydalanishi hisobiga bu ko‘rsatkich kunma-kun ortib bormoqda”, — deyiladi murojaatda.
Ta’kidlanishicha, yo‘lovchilar sonining keskin ko‘payishi metro vagonlariga belgilangan yo‘lovchilar sonining ikki marta ko‘payishi va buning hisobiga vagonlarga normadan ortiq yuklama tushib, metro poyezdlarining tez-tez buzilishiga olib kelmoqda.
Shu bilan birga, poytaxt metrpoliteniga ko‘ra, yo‘lovchilar tomonidan metropolitendan foydalanish qoidalariga rioya qilinmayotgani, yaʼni harakatlanish vaqtida o‘zaro hurmatni saqlash, poyezd ichidagi yo‘lovchilar chiqib ketguniga qadar kirish uchun vagon eshiklari oldida turib qolish, manzilga kelgach poyezddan chiqish uchun imkon qadar tezroq harakat qilish, vagon eshiklariga suyanish hamda poyezdning bosh va so‘nggi vagonlari bilan bir qatorda o‘rta vagonlaridan teng foydalanmayotganliklari asosiy sabablardan biri bo‘lmoqda.
Shuningdek, yo‘lovchilar tomonidan vagonlarda va metropoliten hududida shaxsiy buyumlarni qoldirib ketish kabi holatlar kuzatilmoqda. Bunda tekshirish maqsadida, yo‘nalishdagi poyezdning harakati yo‘nalishidan olinadi va harakat intervali uzayishiga olib keladi (oxirgi haftada 9 ta shunday holat kuzatilgan).
Bugungi kunda metropoliten yo‘lovchilariga yanada qulay va maʼdaniyatli xizmat ko‘rsatish maqsadida 6 ta harakat tarkibi beshta vagondan tashkil topgan holda xizmat ko‘rsatib kelmoqda, ularning soni shu yilning oxiriga qadar 13 taga yetkaziladi.
Bundan tashqari, 2023-yil yakuniga qadar 56 ta va 2024-yil davomida yana qo‘shimcha 104 dona zamonaviy metro vagonlarini xarid qilish ko‘zda tutilgan. Buning natijasida, tasarrufdagi harakat tarkiblarining yangilanishiga hamda yo‘nalishlarda poyezdlar oraliq intervalini qisqartirishga erishiladi.
“Yangi metro vagonlari kelishiga ikki oy qolgani va yangi vagonlar kelishi bilan Chilonzor, O‘zbekiston, Yunusobod va Yerusti halqa yo‘li yo‘nalishida vagonlar soni ortadi hamda buning hisobiga oraliq interval yanada kamaytiriladi.
Shularni hisobga olib, hurmatli yo‘lovchilarimizdan tig‘iz vaqtlarda to‘la vagonlarga chiqmasdan, keyingi bo‘shroq metro vagonlariga chiqishlarini so‘raymiz. Yo‘lovchilardan ushbu holatlarni to‘g‘ri qabul qilgan holda, sizlar uchun uzog‘ingizni yaqin qilayotgan metropoliten jamoasini qo‘llab-quvvatlashingizni so‘raymiz”, — deyiladi xabarda.
Eslatib o‘tamiz, 2019-yilda metropolitenning 20 vagondan iborat birinchi partiyasi Toshkentga yetib kelgandi. 2021-yilning avgust oyida esa “Metrovagonmash” AJ O‘zbekistonga yana 20 ta metro vagonini jo‘natgan. “Metrovagonmash” AJ va Toshkent metropoliteni 40 metro vagonini ishlab chiqarish bo‘yicha shartnomani 2021-yilning aprel oyida imzolagan. Moliyalashtirish manbalari Rossiyaning Rivojlanish va tashqi iqtisodiy aloqalar davlat banki va Rossiya eksport-import banki kreditlari hisoblanadi.
Izoh (0)