Toshkent metropoliteni O‘zbekistonga Rossiyadan zamonaviy metro poyezdlari olib kelinishi haqida tarqalgan xabarlarga munosabat bildirdi.
Ijtimoiy tarmoqlarda Toshkent metropoliteni Rossiyadan 10 dona zamonaviy metro poyezdini yetkazib berish bo‘yicha shartnoma imzolagani aytilgan xabarlar tarqaldi.
Poytaxt metropoliteniga ko‘ra, eʼlon qilingan maqoladagi maʼlumotlar eski bo‘lib, ko‘rsatib o‘tilgan 10 dona harakat tarkiblari 2021-yilda bosqichma-bosqich ravishda xarid qilingan va hozirgi vaqtda metro yo‘nalishlarida xizmat ko‘rsatmoqda.
“Shu o‘rinda ijtimoiy tarmoq foydalanuvchilaridan bu kabi chalg‘ituvchi maʼlumotlarni tarqatmasliklarini so‘raymiz”, — deyiladi munosabatda.
Eslatib o‘tamiz, 2019-yilda metropolitenning 20 vagondan iborat birinchi partiyasi Toshkentga yetib kelgandi. 2021-yilning avgust oyida esa “Metrovagonmash” AJ O‘zbekistonga yana 20 ta metro vagonini jo‘natgan.
Ma’lumot uchun, “Metrovagonmash” AJ va Toshkent metropoliteni 40 metro vagonini ishlab chiqarish bo‘yicha shartnomani 2021-yilning aprel oyida imzolagan. Moliyalashtirish manbalari Rossiyaning Rivojlanish va tashqi iqtisodiy aloqalar davlat banki va Rossiya eksport-import banki kreditlari hisoblanadi.
Izoh (0)