Тошкент метрополитени охирги вақтларда метродан фойдаланувчи йўловчилар сони ошиб кетгани сабаб мурожаат билан чиқди.
Қайд этилишича, сентябр ойидан бошлаб метрополитендан фойдаланувчи йўловчилар сони ўтган йилга нисбатан мутаносиб равишда кунига 200 мингдан ортиши кузатилган. Ҳозирги вақтда бир кунда ўрта ҳисобда метрополитендан фойдаланувчи йўловчилар сони 690-700 мингни ташкил этмоқда.
“Айниқса, 20-сентябр санасидан бошлаб кўчаларда 10 баллик автомашина тиқилинчлиги сабабли автобуслардаги йўловчиларнинг бир қисми метродан фойдаланиши ҳисобига бу кўрсаткич кунма-кун ортиб бормоқда”, — дейилади мурожаатда.
Таъкидланишича, йўловчилар сонининг кескин кўпайиши метро вагонларига белгиланган йўловчилар сонининг икки марта кўпайиши ва бунинг ҳисобига вагонларга нормадан ортиқ юклама тушиб, метро поездларининг тез-тез бузилишига олиб келмоқда.
Шу билан бирга, пойтахт метрполитенига кўра, йўловчилар томонидан метрополитендан фойдаланиш қоидаларига риоя қилинмаётгани, яъни ҳаракатланиш вақтида ўзаро ҳурматни сақлаш, поезд ичидаги йўловчилар чиқиб кетгунига қадар кириш учун вагон эшиклари олдида туриб қолиш, манзилга келгач поезддан чиқиш учун имкон қадар тезроқ ҳаракат қилиш, вагон эшикларига суяниш ҳамда поезднинг бош ва сўнгги вагонлари билан бир қаторда ўрта вагонларидан тенг фойдаланмаётганликлари асосий сабаблардан бири бўлмоқда.
Шунингдек, йўловчилар томонидан вагонларда ва метрополитен ҳудудида шахсий буюмларни қолдириб кетиш каби ҳолатлар кузатилмоқда. Бунда текшириш мақсадида, йўналишдаги поезднинг ҳаракати йўналишидан олинади ва ҳаракат интервали узайишига олиб келади (охирги ҳафтада 9 та шундай ҳолат кузатилган).
Бугунги кунда метрополитен йўловчиларига янада қулай ва маъданиятли хизмат кўрсатиш мақсадида 6 та ҳаракат таркиби бешта вагондан ташкил топган ҳолда хизмат кўрсатиб келмоқда, уларнинг сони шу йилнинг охирига қадар 13 тага етказилади.
Бундан ташқари, 2023 йил якунига қадар 56 та ва 2024 йил давомида яна қўшимча 104 дона замонавий метро вагонларини харид қилиш кўзда тутилган. Бунинг натижасида, тасарруфдаги ҳаракат таркибларининг янгиланишига ҳамда йўналишларда поездлар оралиқ интервалини қисқартиришга эришилади.
“Янги метро вагонлари келишига икки ой қолгани ва янги вагонлар келиши билан Чилонзор, Ўзбекистон, Юнусобод ва Ерусти ҳалқа йўли йўналишида вагонлар сони ортади ҳамда бунинг ҳисобига оралиқ интервал янада камайтирилади.
Шуларни ҳисобга олиб, ҳурматли йўловчиларимиздан тиғиз вақтларда тўла вагонларга чиқмасдан, кейинги бўшроқ метро вагонларига чиқишларини сўраймиз. Йўловчилардан ушбу ҳолатларни тўғри қабул қилган ҳолда, сизлар учун узоғингизни яқин қилаётган метрополитен жамоасини қўллаб-қувватлашингизни сўраймиз”, — дейилади хабарда.
Эслатиб ўтамиз, 2019 йилда метрополитеннинг 20 вагондан иборат биринчи партияси Тошкентга етиб келганди. 2021 йилнинг август ойида эса “Метровагонмаш” АЖ Ўзбекистонга яна 20 та метро вагонини жўнатган. “Метровагонмаш” АЖ ва Тошкент метрополитени 40 метро вагонини ишлаб чиқариш бўйича шартномани 2021 йилнинг апрель ойида имзолаган. Молиялаштириш манбалари Россиянинг Ривожланиш ва ташқи иқтисодий алоқалар давлат банки ва Россия экспорт-импорт банки кредитлари ҳисобланади.
Изоҳ (0)