Hisob palatasi tomonidan Andijon davlat universitetida stipendiya to‘lovlari orqali mablag‘larni noqonuniy o‘zlashtirish risklari aniqlandi.
Aniqlangan shubhali holatlar joyiga chiqqan holda tekshirilganda jami 39,3 milliard so‘m naqd pul mablag‘lari talon-taroj qilingani aniqlandi. Jumladan:
- kontrakt mablag‘lari hisobidan stipendiyasiz shaklda tahsil olgan 8 761 nafar talabaga 25,1 milliard so‘m ortiqcha stipendiya hisoblanib, to‘lov qaydnomalari soxtalashtirilgan;
- talabalar tomonidan to‘langan 9,3 milliard so‘m to‘lov-kontrakt summalari universitet hisob raqamiga kirim qilinmagan;
- talabalarga hisoblangan 2,7 milliard so‘m rag‘batlantirish mablag‘lari tarqatilmasdan, ularning imzolari soxtalashtirilgan;
- budjet mablag‘lari hisobidan 2 226 nafar talabaga bitta davr uchun ikki martadan 1,1 milliard so‘m ortiqcha hisoblangan stipendiya o‘zlashtirilgan;
- talabalar yotoqxona ijarasidan tushgan 911,8 million so‘mlik naqd pullar universitet hisob raqamiga kirim qilinmasdan noqonuniy o‘zlashtirilgan.
Bundan tashqari, davlat xaridlari to‘g‘risidagi qonunchilik talablariga zid ravishda universitetga xizmat uyi xarid qilish uchun jismoniy shaxs bilan 2,5 milliard so‘mlik to‘g‘ridan to‘g‘ri shartnoma tuzilib, shundan 300 million so‘mi noto‘g‘ri o‘tkazilgan. Aniqlangan noqonuniy o‘zlashtirilgan mablag‘lardan 5,1 milliard so‘mi undirilishi taʼminlangan.
Tekshirish yakuni bilan rasmiylashtirilgan hujjatlar to‘plami huquqiy baho berish uchun huquqni muhofaza qiluvchi organlarga yuborilgan.
Avvalroq O‘zbekistonda 28 ta davlat organlari va tashkilotlarining 115 turdagi maʼlumotlar bazasidan real vaqt rejimida foydalanish tizimi yo‘lga qo‘yilib, yagona “Masofaviy nazorat” markazi tashkil etilgandi.
Izoh (0)