Xalq deputatlari Qashqadaryo viloyati kengashining viloyat mahalliy budjeti qo‘shimcha manbalari hisobidan mablag‘larni yo‘naltirish ko‘zda tutilgan qarori qabul qilindi. 9-oktyabr kuni qabul qilingan qaror bilan 23 milliard so‘mdan ortiq mablag‘ turli maqsadlar uchun yo‘naltirilgan.
Qaror ilovasiga ko‘ra, viloyat mahalliy budjetining qo‘shimcha manbalari hisobidan “Eng tashabbuskor sektor” nominatsiyasida g‘olib bo‘lgan Qarshi shahar 1-sektor rahbari, ya’ni shahar hokimi Normo‘min Xolboyevni rag‘batlantirish uchun 56,2 million so‘m mablag‘ ajratilgan. Bunga Vazirlar Mahkamasining 2021-yil 23-avgustdagi 536-sonli qarori asos qilib olingan.
Sentyabr o‘rtalarida Qarshi shahri hokimi Normo‘min Xolboyev o‘zini rag‘batlantirish uchun 75 million so‘m mablag‘ ajratish haqida qaror chiqargandi. “E-qaror” elektron tizimiga joylashtirilgan mazkur hujjat 2023-yilning 25-avgust kuni shahar hokimi Normo‘min Xolboyev tomonidan imzolangan.
Shundan so‘ng, Qarshi shahar hokimining qarori amaldagi qonunchilik hujjatlari talablariga zid tarzda qabul qilingani aniqlanib, Korrupsiyaga qarshi kurashish agentligi tomonidan Korrupsiyani keltirib chiqaruvchi sabab va shart-sharoitlarni bartaraf etish choralarini ko‘rish to‘g‘risida taqdimnoma kiritilgan. Taqdimnomaga asosan, Qashqadaryo viloyat hokimining 2023-yil 19-sentabr kuni 414-4-0-Q/23-son qarori bilan Qarshi shahar hokimining ushbu qarori bekor qilingan edi.
Izoh (0)