Qarshi shahri hokimi Normo‘min Xolboyev o‘zini rag‘batlantirish uchun 75 million so‘m mablag‘ ajratish haqida qaror chiqardi.
“E-qaror” elektron tizimiga joylashtirilgan mazkur hujjat 2023-yilning 25-avgust kuni shahar hokimi Normo‘min Xolboyev tomonidan imzolangan.
“Qarshi shahar hokimligining xarajatlariga mablag‘ ajratish to‘g‘risida”gi qarorda hokimlikning 2023-yildagi zaxira jamg‘armasi mablag‘lari hisobidan viloyat miqyosida “Eng tashabbuskor sektor” deya e’tirof etilgan 1-sektor rahbarini rag‘batlantirish xarajatlariga 75 million so‘m mablag‘ ajratish lozimligi yozilgan.
Mazkur ma’lumotga javob qaytargan shahar hokimligi axborot xizmatiga ko‘ra, Vazirlar Mahkamasining 2021-yil 23-avgustdagi “Hududlarni kompleks ijtimoiy-iqtisodiy rivojlantirish bo‘yicha sektorlar faoliyati samaradorligini baholash tizimini joriy etish chora-tadbirlari to‘g‘risida”gi 536-sonli qarori va mazkur qaror bilan tasdiqlangan Nizomga asosan “Eng namunali sektor” va “Eng tashabbuskor sektor”ni aniqlash hamda g‘olib bo‘lgan sektorlarni moddiy rag‘batlantirish tartibi belgilangan.
Ta’kidlanishicha, mazkur tartibga ko‘ra viloyat hokimligining 2023-yil 1-martdagi yig‘ilish bayoniga asosan 2022-yil yakuni bo‘yicha samaradorligi yuqori baholangan sektor rahbarlari orasida Qarshi shahar 1-sektor rahbari viloyatda eng yuqori ko‘rsatkichga ega sektorlar uchligiga kiritilib, “Eng tashabbuskor sektor”, deb e’tirof etilgan.
Vazirlar Mahkamasining 2021-yil 23-avgustdagi 536-sonli qarori va O‘zbekiston Respublikasi prezidenti huzuridagi davlat xizmatini rivojlantirish agentligining 2023-yil 16-fevraldagi aloqa xati ijrosini ta’minlash maqsadida, shuningdek, viloyat hokimligining 2023-yil 24-avgustdagi viloyatda “Eng tashabbuskor sektor” deb e’tirof etilgan Qarshi shahar 1-sektor rahbarini mahalliy budjet mablag‘lari hisobidan rag‘batlantirish to‘g‘risidagi ko‘rsatma xatiga asosan 1-sektor rahbarini rag‘batlantirish xarajatlari uchun belgilangan tartibda mablag‘ ajratilgani ma’lum qilinadi, — deyiladi hokimlik munosabatida.
Izoh (0)