Toshkent viloyatining Qozog‘iston bilan chegaradosh “Yallama” chegara bojxona postida furgondan qariyb 20 kilogramm geroin aniqlandi. Bu haqda Davlat bojxona qo‘mitasi xabar berdi.
Hujjatlarga ko‘ra bo‘sh deya ko‘rsatilgan Tojikiston davlat raqamiga ega yuk mashinasi salonining pol qismi ostidan skotch bilan o‘ralgan 36 dona o‘ram yashirilgani maʼlum bo‘lgan. Ular ichidan o‘tkir hidli modda, dastlabki maʼlumotlarga ko‘ra, geroin chiqqan.
Hozirda ushbu holat yuzasidan tergov harakatlari olib borilmoqda.
Giyohvand moddalar savdosi
Iyul oyida Toshkent xalqaro aeroportida so‘nggi 30 yil ichidagi eng yirik miqdordagi — 8,5 tonna giyohvandlik moddasi to‘xtatib qolingandi. Mart oyi o‘rtalarida esa DXX Chegara qo‘shinlari va Namangan viloyati bo‘yicha boshqarmasi harbiy xizmatchilari tomonidan olib borilgan tezkor-qidiruv tadbirlarida katta miqdordagi narkotik moddalarning o‘zbek-qirg‘iz davlat chegarasidan noqonuniy o‘tkazilgan holati aniqlangan edi.
Shuningdek, Navoiy viloyatida narkotik moddalar savdosi bilan shug‘ullanuvchi jinoiy guruh qo‘lga olingani, Toshkentda giyohvand moddalar savdosi bilan shug‘ullangan talabalar ushlangani, Samarqanddagi tungi klubda 10 ming AQSH dollari evaziga giyohvand modda sotishga uringanlar qo‘lga tushgani to‘g‘risida xabar berilgandi.
Izoh (0)