Toshkent halqa avtomobil yo‘lining Yunusobod tumani Bog‘ishamol ko‘chasi hududiga to‘g‘ri keluvchi Respublika perinatal markazi, Bo‘zsuv va Salor kanallari hududi axlatga to‘lib ketgan, tug‘uruqxona atrofi esa yuk mashinalari turadigan joyga aylantirib yuborilgan. Bu haqda “UzReport” telekanalida maʼlum qilindi.
Aytilishicha, Bo‘zsuv va Salor kanallari juda achinarli holatda. Kanallar na o‘t-o‘lanlardan, na chiqindilardan tozalangan, atrofi qarovsiz va axlatxonaga aylanib qolgan. Holbuki mahalliy aholining eslashicha, bu yerlar 10 yilcha avval yam-yashil daha edi. Hozir esa daraxtlar kesilgan, uning o‘rnini esa bahaybat yuk mashinalari egallagan.
Masalan, Universitet ko‘chasidan Salor kanaligacha piyodalar yo‘lagi yo‘q ekanligi bois yo‘lovchilar mashina yo‘lining bir qismidan yurishga majbur. Bu esa aholi xavfsizligiga ham, yo‘l tartib-qoidasiga ham mutlaqo to‘g‘ri kelmaydi.
Shu yo‘lning qarama-qarshi tomoni — Toshkent pediatriya tibbiyot instituti klinikasiga eltuvchi yo‘l qurilish uchun mo‘ljallangan og‘ir mashinalar turar joyiga aylantirilgan. Yuk mashinalarning turar joyi bo‘lmagan bu hududning endilikda band etilgani piyodalar va talabalarga noqulaylik tug‘dirmoqda. Achinarlisi, bu maydon qachonlardir so‘lim xiyobon bo‘lgan va afsuski, bugungi kunga kelib daraxtlar kesilgan hamda hudud betonlab tashlangan.
Noqulayliklar hamda atrof-muhitning tobora qarab bo‘lmas ahvolga aylanib borayotgani mahalliy aholi, shuningdek, institut talabalarining noroziligiga ham sabab bo‘lmoqda. Talabalarning aytishicha, hozirda yo‘llar tirband, piyodalar yo‘lagi yo‘q, bori ham ta’mirtalab. Yog‘in-sochinli kunlarda harakatlanish juda katta qiyinchilik tug‘diradi.
Mazkur hududni obod qilish uchun talabalar yo‘l chetiga daraxt va gullar ekilishi yuzasidan masʼullarga taklif bilan chiqishmoqda. Biroq bunday takliflar javobsiz qolgan.
Aholi vakillari hamda universitet ma’muriyati yo‘l infratuzilmasi bilan bog‘liq muammolar yaqin orada tartibga keltirilishiga umid qilmoqda.
Izoh (0)