DXX xodimlari Surxondaryo viloyatida 9,3 kilogramm narkotik moddaning savdosiga chek qo‘ydi.
Ma’lum qilinishicha, Termiz tumanida harakatlanayotgan Matiz rusumli avtomashina to‘xtatilib, ko‘zdan kechirilganda, unda yo‘lovchi sifatida ketayotgan, Samarqand shahrida tug‘ilgan, Termiz shahrida vaqtincha istiqomat qiluvchi, muqaddam sudlangan 44 yoshli fuqaroning yonida 4 kilogramm 827 gramm opiy moddasi borligi aniqlanib, ashyoviy dalil sifatida rasmiylashtirib olingan.
Tezkor surishtiruv harakatlari davomida, ushbu giyohvandlik vositasi muqaddam afg‘onistonlik narkokuryerlar tomonidan kontrabanda yo‘li bilan keltirib berilgani maʼlum bo‘lgan.
Boshqa holatda esa Sariosiyo tumanida yashovchi, 1979 va 1982-yillarda tug‘ilgan aka-uka 3 kilogramm 627 gramm opiy va 919 gramm gashish moddalarini 30 ming dollarga sotgan vaqtlarida ushlangan.
Aniqlanishicha, ushbu giyohvandlik vositalari muqaddam tojikistonlik narkokuryerlar tomonidan kontrabanda yo‘li bilan Sariosiyo tumaniga keltirib berilgan.
Ta’kidlanishicha, ushbu aka-uka muqaddam giyohvandlik vositalari bilan bog‘liq jinoyatlari uchun sudlangan.
Hozirda har ikki holat yuzasidan mazkur fuqarolarga nisbatan Jinoyat kodeksining tegishli moddalari bilan jinoyat ishlari qo‘zg‘atilib, qamoqqa olish tarzidagi ehtiyot chorasi qo‘llangan. Tergov harakatlari olib borilmoqda.
Bundan oldin Jizzax va Qashqadaryoda qariyb salkam 15,5 kilo giyohvandlik vositasining noqonuniy savdosiga chek qo‘yilgani to‘g‘risida xabar berilgandi.
Izoh (0)