O‘zbekiston ilk bor 4,25 trln so‘m miqdoridagi yashil suveren xalqaro obligatsiyalar hamda 660 mln dollar miqdoridagi xalqaro obligatsiyalarni London fond birjasida joylashtirdi. Bu haqida Iqtisodiyot va moliya vazirligi xabar berdi.
Ma’lumot uchun: joriy yilning 2-4 oktyabr kunlari Iqtisodiyot va moliya vazirligi hamda Markaziy bank vakillaridan iborat O‘zbekiston Respublikasining delegatsiyasi Nyu-York, Boston va London shaharlarida 50 dan ortiq investorlar bilan uchrashuvlar o‘tkazdi.
"Uchrashuvlarda O‘zbekiston prezidenti rahbarligida amalga oshirilayotgan islohotlar, jumladan, yashil iqtisodiyotga o‘tish, tabiiy gaz va elektr energiyasi narxlari bozorini liberallashtirish, davlat korxonalarini xususiylashtirish hamda Xalqaro savdo tashkilotiga a’zo bo‘lish orqali savdoni erkinlashtirish siyosati hamda “O‘zbekiston-2030” strategiyasida belgilangan maqsadlar va chora-tadbirlar investorlar tomonidan yuqori baholandi", — deyiladi vazirlik xabarida.
Shuni ta’kidlash joizki, so‘mda chiqarilgan suveren xalqaro obligatsiyalar MDH davlatlari ichida ilk “yashil” suveren obligatsiyalar hisoblanadi.
Ma’lumot uchun: yashil obligatsiyalar bo‘yicha kelib tushadigan mablag‘lar suv tejovchi texnologiyalarni joriy qilish, temir yo‘l transporti va metro transportini rivojlantirish, sanitar tozalash ishlarini tashkil etish va aholi punktlarida tozalikni ta’minlash, shamol eroziyasiga va suv xo‘jaligi obyektlarining qum bosishiga qarshi ihota daraxtzorlari barpo etish kabi yashil loyihalarni moliyalashtirish uchun yo‘naltiriladi.
Bunda loyihalarni tanlab olish jarayoniga Birlashgan millatlar tashkilotining rivojlanish dasturi (UNDP) jalb qilingan. Yashil obligatsiyalar dasturi bo‘yicha “Sustainalytics” tomonidan ikkinchi taraf ijobiy xulosasi olingan.
O‘zbekiston Respublikasining milliy valyutadagi “yashil” obligatsiyalariga bo‘lgan yuqori talabni inobatga olib, 3 yillik so‘mdagi xalqaro obligatsiyalarning foiz stavkalarini (kupon to‘lovi) kutilgan 18 foizdan 16,25 foizga tushirishga muvaffaq bo‘lindi. Mazkur tranzaksiya bilan so‘ndirish muddati joriy yilning 23-noyabr kuni bo‘lgan 1,9 trln. so‘m miqdoridagi xalqaro obligatsiyalar muddatidan oldin so‘ndirildi.
Ma’lumot uchun: ichki moliya bozorlarida so‘nggi o‘tkazilgan auksionda (26-sentyabr) 2 yillik davlat qimmatli qog‘ozlari bo‘yicha foiz stavkalari 17,57 foizni tashkil qilgan.
Ikkilamchi bozor kotirovkalari hamda investorlar takliflaridan kelib chiqib, AQSH dollaridagi O‘zbekiston Respublikasining 5 yillik suveren xalqaro obligatsiyalari uchun dastlabki foiz stavkasi 8,50 – 8,625 foiz oralig‘ida e’lon qilindi.
Ikkilamchi bozorda O‘zbekiston Respublikasining 2029-yilda so‘ndiriladigan xalqaro obligatsiyalari foiz stavkasi 8,1 foizga yetgan. Xususan, so‘nggi bir haftada (27-sentyabr – 7,67 foiz) foiz stavkalari 0,43 foizga oshgan.
Buyurtmalar kitobi 1,7 mlrd. dollarga yetganda, foiz stavkalarni 8,25-8,375 foizga tushirishga erishildi.
Yakuniy talab 2 mlrd. dollarga yetgach, 660 mln. dollar miqdoridagi obligatsiyalar 8,125 foiz stavkada hamda 7,85 foiz kuponda chiqarildi. Mazkur kupon stavkasi moliyaviy maslahatchilar tomonidan tavsiya etilib, xalqaro obligatsiyalarni investorlarga 98,888% narxda sotilishini anglatadi (ya’ni mazkur tranzaksiyadan 652,6 mln. dollar mablag‘ kelib tushadi).
Bugungi kunda jahon moliya bozorlarida foiz stavkalarining oshishi kuzatilmoqda. Xususan, 5 yillik AQSH G‘aznachilik obligatsiyalari foiz stavkalari 2021-yil iyul (so‘nggi marta suveren obligatsiyalar chiqarilgan davr) oyiga nisbatan qariyb 4 foizga oshib, 2021-yil iyul oyidagi 0,8 foizdan 4,7 foizga yetdi.
Jahon moliya bozorlaridan foiz stavkalarining oshishi, mos ravishda, xalqaro moliya institutlarining imtiyozli foiz stavkalarining ham keskin oshishiga sabab bo‘lmoqda.
Xalqaro kredit bozorlarida ishlatiladigan SOFR (oldin LIBOR) stavkasi 2021-yil iyul oyidan beri 0,17 foizdan qariyb 5,3 foizga oshib, bugungi kunda 5,5 foizga yetdi.
Shuning uchun, xalqaro moliya institutlari tomonidan jalb qilinayotgan imtiyozli kreditlar bo‘yicha foiz stavkalar ham ikki yil ichida 1-2 foizdan bugungi kunga kelib 6,3-7,0 foizga yetdi.
"Joriy bozor sharoitlari sababli boshqa mamlakatlar ham oldingiga nisbatan yuqori foiz stavkalarida davlat qarzini jalb qilmoqda.
Yashil obligatsiyalarni joylashtirishdan tushgan kelib tushgan mablag‘larning sarflanishi yuzasidan hisobot xalqaro standartlarga muvofiq shakllantiriladi va e’lon qilib boriladi", - deyiladi vazirlik xabarida.
Avesta Investment Group boshqaruvchi hamkori, mutaxassis Karen Srapionov bu O‘zbekiston uchun nimani anglatishi va bundan mamlakat qanday foyda olishi haqida o‘z fikri bilan o‘rtoqlashdi.
“O‘zbekiston biroz pauzadan so‘ng qarz bozoriga qaytdi va yaxshi joylashtirish tufayli o‘zining yuqori kutilgan emitent maqomini tasdiqladi. Xabarda taʼkidlanganidek, ushbu emissiyalar avval chiqarilgan so‘m emissiyalaridan birini muddatidan oldin to‘lashga yo‘naltirilgan bo‘lib, dollar emissiyasidan tushgan mablag‘lar, katta ehtimol bilan, muomala muddati 2024-yilda yakunlanadigan debyut emissiyalaridan birini to‘lash uchun yo‘naltiriladi.
Xalqaro kapital bozorlariga kirish mamlakatga rivojlanish uchun mablag'larni muntazam ravishda qarzga olish va mamlakatga pul jalb qilish imkoniyatini beradi. Bu masalalar yaqqol ko‘rsatdiki, mamlakat iqtisodiyotini rivojlantirish, sarmoyadorlar bilan muloqot va hokazolarda yuqori darajani saqlab turgan holda, bunday qarzlar, aslida, mamlakat ichida qolib, iqtisodiyot va aholi manfaati uchun ishlaydigan abadiy pulga aylanadi.
Har safar oldingi qarzni to'lash vaqti kelganda, u yangisi bilan qayta moliyalashtiriladi va mamlakat faqat foizlarni to'laydi. Agar iqtisodiy o'sish va islohotlar yaxshi ketsa, qarz narxi asta-sekin kamayadi.
Bu safar narx ancha yuqori bo'lib chiqdi, ammo bu butun jahon iqtisodiyotidagi sharoitlar o'zgarganligi va risksiz stavkalar ko'p yillik eng yuqori darajalarga ko'tarilganligi bilan bog'liq. Men bu masalani nihoyatda ijobiy deb baholayman”, — dedi Karen Srapionov.
Izoh (0)