O‘zbekistonda ro‘yxatdan o‘tmay faoliyat yuritayotgan Yandex.Go (Taxi) xizmati tarmoqlarda keskin e’tirozlarga sabab bo‘lmoqda. Faollar mazkur kompaniya soliqqa tortilishi, yaʼni boshqa ishtirokchilar qatori qonunlarga rioya qilgan holda ishlashini talab qilmoqda.
Yandex.Go (Taxi) soliqqa tortiladimi?
Yandex.Go xizmati haqida o‘nlab postlar eʼlon qilgan iqtisodchi Otabek Bakirov masʼullarga “O‘zbekistondan soliq to‘lamasdan, real kunlik rejimda olib chiqib ketayotgan pullarining sxemalari haqida yozish maʼnoga egami? Asosiysi, xavfsizmi?”, degan savollarni bergan.
“Yandeksni O‘zbekiston huquqiy va soliq rezidentligiga qaytarish budjet bilan bog‘liq muvozanat izdan chiqqan bugungi realliklarda eng asosiy masalalardan biri bo‘lishi kerak.
Lekin bizning nomimizdan ish ko‘radigan, uch soatda har qanday qonunlarni o‘zgartirib yuborishga tayyor parlamentimiz jim. Hukumatimiz jim. Kelishib olingan jimlikning sababi Yandeks benefitsiarlari shimoldagi og‘alarga borib taqalmaydimi?” — dedi iqtisodchi.
Bloger, huquqshunos Xushnudbek Xudoyberdiyev o‘z Telegram kanalida “Nega Yandex.Go (Taxi) O‘zbekistonda ro‘yxatdan o‘tmagan? Nega boshqa taksi agregatorlari kabi teng soliq to‘lamaydi? Ularning shoxi bormi?” degan savollarni qo‘ygan.
“Negadir Yandex.Go xizmatidan foydalanganda terminallar orqali plastik karta bilan to‘lash imkoni yo‘q. To‘lov uchun hech qanaqa chek ham berilmaydi.
Chunki Yandex O‘zbekistonda yuridik shaxs tashkil qilmasdan, boshqacha aytganda, yurtimizda soliq rezidenti bo‘lmasdan turib, yuz minglab fuqarolarga xizmat ko‘rsatadi. Tushgan milliardlab pullar esa Niderlandiyadagi hisobraqamga o‘tkaziladi.
Garchi avvalgi bayonotlarda biz shunchaki dasturiy taʼminot sotamiz, taksi xizmati ko‘rsatmaymiz, deyishgani bilan, bu gaplar shunchaki ertak va safsata. Sababi tizimga ulangan plastik raqam orqali to‘lov amalga oshirilsa, pul O‘zbekistonda ro‘yxatdan o‘tgan taksoparklar hisobiga emas, balki Yandex hisobiga yechiladi. Tarif va narxni, marshrutni va taksi xizmati uchun muhim bo‘lgan boshqa jihatlarni ham Yandex belgilaydi. Boshqacha aytganda, O‘zbekiston qonunchiligi bo‘yicha, Yandex to‘liqligicha yo‘lovchilarga transport xizmati ko‘rsatish to‘g‘risidagi bitim ishtirokchisi hisoblanadi.
Ammo ushbu kompaniyaning taksi xizmati ko‘rsatish uchun, elektron to‘lovlar qabul qilish uchun litsenziyasi yo‘q. O‘zbekistonda ro‘yxatdan o‘tmagan, soliq rezidenti ham emas. Axir bu qip-qizil soliqdan qochish sxemasi emasmi? Bunaqada sog‘lom raqobat haqida yana qanaqa gap bo‘lishi mumkin?” — deydi bloger.
Soliq qo‘mitasi mazkur holat bo‘yicha “Daryo”ga izoh berdi.
Maʼlum qilinishicha, joriy yilning sentyabr oyida Ridetech International B.V. (Yandex.Go) kompaniyasiga ikki oy muddatda o‘z faoliyatini qonun hujjatlari asosida tashkil etish bo‘yicha Soliq qo‘mitasi tomonidan quyidagi talablar qo‘yilgan:
1. Faoliyatni amalga oshirish uchun O‘zbekiston Respublikasining soliq rezidenti sifatida ro‘yxatdan o‘tish va belgilangan soliqlarni to‘lash;
2. Soliq organlari axborot tizimi bilan integratsiyalashuvni taʼminlash va mijozlarga avtomatik shakllantiriladigan fiskal chek taqdim etish.
2023-yil 1-dekabrga qadar yuqoridagi talablar bajarilmagan taqdirda, Soliq qo‘mitasi Raqamli texnologiyalar vazirligiga Yandex.Go kompaniyasining O‘zbekiston hududida agregator sifatida foydalanib kelinayotgan elektron platformadan foydalanishni bloklash bo‘yicha rasmiy murojaat bilan chiqishini maʼlum qiladi.
“Yandex” kompaniyasi mazkur holat bo‘yicha “Daryo”ga izoh berdi.
“Yandex” kompaniyasi mamlakatda Davlat soliq qo‘mitasi bilan bu borada hamkorlikni boshlagan birinchi platforma ekani haqida ta’kidlab o‘tdi.
“Yandex.Go O‘zbekistonda odatdagidek ishlamoqda va shunday davom etadi. Biz Davlat soliq qo‘mitasi bilan mahalliylashtirish mavzusida muloqot olib boryapmiz va bozor amaliyoti ustida hamkorlikda ishlayapmiz. Taksi onlayn buyurtma berish xizmatlarida fiskal tushumlar bozor uchun ko‘p mehnat talab qiladigan jarayon hisoblanadi.
Biz mamlakatda Davlat soliq qo‘mitasi bilan bu borada hamkorlikni boshlagan birinchi platformamiz”, — deyiladi rasmiy izohda.
Izoh (0)