Humo tizimida uzulishlar kuzatilayotgani yuzasidan rasmiy ma’lumot berildi

Humo tizimidagi uzilishlar tufayli odamlar to‘lovlarni amalga oshirish, pul o‘tkazmalari va onlayn xizmatlardan foydalanishda qiyinchiliklarga duch kelayotgani haqida xabarlar tarqaldi. Markaziy bank mazkur xabarlarga tushuntirish berdi.

Unga ko‘ra, so‘nggi kunlarda Humo kartalarining ayrim foydalanuvchilari to‘lovlarni amalga oshirishda, shuningdek, mobil (to‘lov) ilovalaridagi pul o‘tkazmalarida qiyinchiliklarga duch kelayotgani kuzatildi.

Kompaniya Markaziy bankni vaziyatdan xabardor qilib, hodisa sabablarini aniqlash uchun barcha zaruriy choralar ko‘rilayotganini ma’lum qildi. Markaziy bank vaziyatni barqarorlashtirish uchun zarur choralarni ko‘rish, xususan, karta egalarining o‘z kartalaridagi mablag‘laridan uzluksiz foydalanishini ta’minlash maqsadida Humo terminallari va bankomatlar ishlashiga alohida e’tibor qaratish bo‘yicha tavsiyalar berdi.