Jenisbek Piyazovning bobosining ismi Piyoz bo‘lganmi? Opera xonandasi noodatiy familiyasining tarixi haqida gapirdi

O‘zbekiston, Qoraqalpog‘iston, Boshqirdiston va Tatariston xalq artisti Jenisbek Piyazov bobosining ismi nima bo‘lgani haqidagi savolga javob berdi.

— Katta bobomning ismi aslida Muhammad bo‘lgan. Ammo u paytlari kelinlar turmush o‘rtog‘ining ukasi, singlisi yoki akasini erkalab boshqa nom bilan chaqiradi. Masalan, Mirza og‘a, Oyyigit yoki Oyqiz deb chaqiradi. Katta bobomiz achchiq gapiradigan inson bo‘lgan ekan. Uydagi kelinlar unga piyoz deb laqab qo‘yishgan ekan. Hujjatlashtirish ishlari boshlanganida katta bobomning ismini so‘rashganida Piyoz deb yuborgan ekan. O‘rganib qolgani uchun asl ismini aytish yodidan chiqqan. Mana shundan keyin Piyazov familiyasi bizga meros bo‘lib qoldi, — deydi Jenisbek Piyazov.

Opera xonandasi endilikda ortiqcha ishlardan voz kechib, pedagoglik faoliyatiga ko‘proq eʼtibor berishi haqida aytib o‘tdi.

— Bundan uch yil avval opera akademiyasini ochishga qaror qilgandim. Ammo bunga hali tayyor emasdim. Yaqinda Italiyaga borib, u yerdagi opera maktablari bilan yanada yaqindan tanishib qaytdim. Bu yerda professional xonandalar tahsil oladi. Ortiqcha ishlarga vaqt sarflamay, endilikda pedogoglik faoliyatimga jiddiy eʼtibor bermoqchiman, — deydi Jenisbek Piyazov.