Женисбек Пиязовнинг бобосининг исми Пиёз бўлганми? Опера хонандаси ноодатий фамилиясининг тарихи ҳақида гапирди 

Ўзбекистон, Қорақалпоғистон, Бошқирдистон ва Татаристон халқ артисти Женисбек Пиязов бобосининг исми нима бўлгани ҳақидаги саволга жавоб берди.

— Катта бобомнинг исми аслида Муҳаммад бўлган. Аммо у пайтлари келинлар турмуш ўртоғининг укаси, синглиси ёки акасини эркалаб бошқа ном билан чақиради. Масалан, Мирза оға, Оййигит ёки Ойқиз деб чақиради. Катта бобомиз аччиқ гапирадиган инсон бўлган экан. Уйдаги келинлар унга пиёз деб лақаб қўйишган экан. Ҳужжатлаштириш ишлари бошланганида катта бобомнинг исмини сўрашганида Пиёз деб юборган экан. Ўрганиб қолгани учун асл исмини айтиш ёдидан чиққан. Мана шундан кейин Пиязов фамилияси бизга мерос бўлиб қолди, — дейди Женисбек Пиязов.

Опера хонандаси эндиликда ортиқча ишлардан воз кечиб, педагоглик фаолиятига кўпроқ эътибор бериши ҳақида айтиб ўтди.

— Бундан уч йил аввал опера академиясини очишга қарор қилгандим. Аммо бунга ҳали тайёр эмасдим. Яқинда Италияга бориб, у ердаги опера мактаблари билан янада яқиндан танишиб қайтдим. Бу ерда профессионал хонандалар таҳсил олади. Ортиқча ишларга вақт сарфламай, эндиликда педогоглик фаолиятимга жиддий эътибор бермоқчиман, — дейди Женисбек Пиязов.