Shimoliy Koreya mamlakatdagi yadro reaktorining ishini to‘xtatdi — OAV

Shimoliy Koreya o‘zining asosiy yadro majmuasidagi yadro reaktorining ishini to‘xtatdi, deb yozmoqda Donga Ilbo gazetasi.

AQSH va Janubiy Koreya razvedkasi maʼlumotlariga ko‘ra, Yonben yadroviy majmuasidagi 5 megavatt quvvatga ega yadro reaktoridagi operatsiyalar sentyabr oyi oxiridan boshlab to‘xtatilgan.

“Janubiy Koreya va Qo‘shma Shtatlar fikricha, bu qurol uchun ishlatiladigan plutoniyni olish uchun olib borilayotgan ishlar belgisi bo‘lishi mumkin”, — deya hukumatdagi manbadan iqtibos keltirgan Donga Ilbo gazetasi.

Yadro reaktorida ishlatilgan yoqilg‘ini olib qayta ishlash plutoniy olishdan oldin amalga oshiriladigan qadamdir; qurol darajasidagi plutoniy yadro qurolini yaratish uchun mo‘ljallangan. Yonben yadroviy majmuasi Shimolning asosiy plutoniy manbai bo‘lib, undan yadroviy qurol yaratishda foydalanib kelingan.

Nashrning qayd etishicha, Shimoliy Koreyada uranni boyitish zavodlari ham mavjud bo‘lib, ular yadro quroli uchun ishlatilishi mumkin bo‘lgan alohida material manbai hisoblanadi.