Buyuk Britaniya hukumati parlamentga 2009-yil 1-yanvardan keyin tug‘ilgan shaxslarga tamaki mahsulotlarini sotishni taqiqlovchi qonun loyihasini kiritmoqchi.
Britaniya hukumati veb-saytida ta’kidlanishicha, kelajakda tamaki sotishning eng kichik yoshi har yili bir yilga oshirib boriladi: bu chora taqiq mamlakatning butun aholisiga taalluqli bo‘lgunga qadar davom etadi. Rasmiylar taqiqning joriy etilishi 2040-yilgacha yoshlar orasida chekishni deyarli butunlay to‘xtatish imkonini beradi deb kutmoqda.
“Men farzandlarimiz uchun yaxshiroq va yorqinroq kelajakni qurmoqchiman, shuning uchun men chekishni butunlay yo‘q qilmoqchiman. Bu o‘zgarishlar farzandlarimizning hech qachon sigaret sotib ololmasligini ta’minlaydi, ularning chekishga odatlanib qolishiga yo‘l qo‘ymaydi hamda hozir va kelajakda ularning salomatligini himoya qiladi”, — dedi tashabbus muallifi Buyuk Britaniya bosh vaziri Rishi Sunak.
Buyuk Britaniyada tamaki sotib olishga 18 yoshdan ruxsat berilgan bo‘lib, hukumat ma’lumotlariga ko‘ra, har yili 64 mingga yaqin odam chekish oqibatlari tufayli hayotdan ko‘z yumadi. Har oyda 75 mingga yaqin fuqaro chekish bilan bog‘liq kasalliklar tufayli shifokorlarga murojaat qiladi. Har yili mamlakat iqtisodiyoti chekish bilan bog‘liq ishsizlik, erta o‘lim va sog‘liqni saqlash xarajatlari tufayli qariyb 17 milliard funt (taxminan 21 milliard dollar) daromadni yo‘qotadi.
Muayyan yoshdan oshgan fuqarolar uchun tamaki sotishni to‘liq taqiqlagan birinchi mamlakat Yangi Zelandiya bo‘lgandi. 2022-yil dekabrida mamlakat parlamenti 2009-yil 1-yanvardan keyin tug‘ilganlarga tamaki sotishni umrbod taqiqlovchi qonunni qabul qildi.
Izoh (0)