Adabiyot bo‘yicha bu yilgi Nobel mukofoti qaysi yozuvchiga berilishi aniq bo‘ldi

Norvegiyalik yozuvchi Yon Fosse 2023-yilgi adabiyot bo‘yicha Nobel mukofotini qo‘lga kiritdi.

Nobel qo‘mitasining press-relizida mukofot unga “ta’riflash qiyin bo‘lgan tuyg‘ularni ifodalovchi innovatsion pyesalari va nasri uchun” berilgani aytilgan. 

2022-yilda fransuz yozuvchisi Enni Erno adabiyot bo‘yicha Nobel mukofotiga sazovor bo‘lgandi. 2021-yilgi adabiyot mukofoti esa tanzaniyalik yozuvchi Abdulrazoq Gurnaga nasib qilgan.

Bir kun avval kimyo bo‘yicha Nobel mukofoti kvant nuqtalarini kashf etgani va sintez qilgani uchun Mungi Bavendi, Luis Brus va Aleksey Ekimovlarga topshirilgandi.

Fizika bo‘yicha bu yilgi Nobel mukofoti esa Pyer Agostini, Ferents Krauz va Ann L’Yuilyega “moddadagi elektronlar dinamikasini o‘rganish uchun attosekundlik yorug‘lik impulslarini yaratishning eksperimental usullari uchun” taqdim qilindi.

Tibbiyot va fiziologiya bo‘yicha mukofotni Katalin Kariko va Dryu Vaysman COVID-19 ga qarshi mRNK vaksinalarini yaratishga olib kelgan tadqiqotlari uchun olishdi.

6-oktabr, juma kuni tinchlik bo‘yicha Nobel mukofoti laureati e’lon qilinadi.

G‘oliblarga mukofotlar 10-dekabr kuni Stokgolmda bo‘lib o‘tadigan rasmiy marosimda topshiriladi.