Bishkekning Pervomayskiy tuman sudi chechenistonlik faol Mansur Movlayevni Qirg‘iziston chegarasini noqonuniy kesib o‘tgani uchun olti oyga ozodlikdan mahrum etish, so‘ng deportatsiya qilish haqida hukm chiqardi.
Mansur Movlayev Qirg‘iziston Respublikasi Jinoyat kodeksining “Chegarani noqonuniy kesib o‘tish” bandida nazarda tutilgan jinoyatni sodir etganlikda aybdor deb topildi, deb xabar bermoqda “24.kg”.
Unga olti oyga umumiy rejimdagi axloq tuzatish koloniyasida jazo tayinlandi. Hukmning boshlanishi 20-avgustdan hisoblanadi. Hukm qonuniy kuchga kirgan va jazo o‘talganidan keyin sud uni mamlakatdan chiqarib yuboradi.
Mansur Movlayevning advokati Baktibek Avtandilning so‘zlariga ko‘ra, himoyachi Checheniston xavfsizlik kuchlari tomonidan qiynoqlarga duchor bo‘lishdan qo‘rqib, unga real muddat tayinlashni talab qilgan.
Mansur Movlayev bir necha bor Chechenistonda inson huquqlari buzilishi va siyosiy repressiyalarga qarshi chiqqan. U respublika rahbari Ramzan Qodirovni tanqid qilgan. 2020-yilda u uch yillik qamoq jazosiga hukm qilindi. 2022-yilda Movlayev shartli ravishda ozodlikka chiqarilgan, biroq u Chechenistonning Shalinskiy tumani ichki ishlar boshqarmasi xodimlari tomonidan hibsga olingan. Movlayev Rossiyadan qochishga muvaffaq bo‘lgan va federal qidiruvga berilgan.
Movlayev 2022-yildan beri Qirg‘izistonda bo‘lib turibdi.
Izoh (0)