Yaponiyaning Fukusima-1 atom elektr stansiyasi operatori Tokyo Electric Power Company (TEPCO) energetika kompaniyasi AESdan okeanga radioaktivli suvning ikkinchi partiyasini oqizishni boshladi. Bu haqda NHK telekanali TEPCO bayonotiga tayanib, xabar berdi.
Kompaniya 17 kun davomida okeanga 7,8 ming tonnaga yaqin tozalangan suvni (jami o‘nta rezervuar) chiqarishni rejalashtirmoqda. To‘kilishdan avval suv dengiz suvi bilan aralashtiriladi — AESdagi bir tonna suvga 1,2 tonna dengiz suvi qo‘shiladi.
Fukusima AES suvining birinchi partiyasini okeanga to‘kish 24-avgustda boshlangandi.
Xitoy Fukusima AESdagi suvni okeanga to‘kishga qarshi
2011-yildagi zilzila va sunami oqibatida yuzaga kelgan avariyadan so‘ng Fukusima AES hududida shikastlangan reaktorlarni sovitishda foydalaniladigan 1 000 dan ortiq suv rezervuarlari to‘planib qolgan, bu taxminan 1,3 million kub metr suvni tashkil etadi. Yaponiya rasmiylariga ko‘ra, 2024-yil boshida barcha rezervuarlar to‘lib bo‘ladi.
Ularda saqlanadigan suv yaxshilab tozalangan, ammo unda hali ham vodorodning radioaktiv izotopi — tritiy bor, bu modda izsiz yo‘qolib ketmaydi. Yaponiya hukumati bu suvni dengizga to‘kish zarurligini aytib, bu dunyoning boshqa atom elektr stansiyalarida ham odatiy hol ekanini ta’kidlamoqda.
Xitoy AESdagi suvni okeanga to‘kishga qat’iyan qarshi. Xitoy elchisi bu dasturni noto‘g‘ri deb atadi hamda Yaponiya dasturni to‘xtatib, birinchi navbatda qo‘shni davlatlar bilan maslahatlashuvlar o‘tkazishi kerakligini aytdi. 4-iyul kuni Atom energiyasi bo‘yicha xalqaro agentlik (MAGATE) rahbari Rafael Grossi Yaponiyaga tashrif buyurdi va suvni okeanga to‘kish qarorini ma’qulladi. Uning ta’kidlashicha, oqindi suv sifatiga, baliqlarga va yaqin atrofdagi manzilgohlarga katta ta’sir qilmaydi.
Avgust oxirida Yaponiya bosh vaziri Fumio Kisida va bir qancha vazirlar Fukusima AESdagi suv okeanga to‘kilgandan keyin tutilgan baliqni omma oldida iste’mol qildi.
Izoh (0)