Turkiya prezidenti Rajab Toyyib Erdo‘g‘on Anqaradagi Ichki ishlar vazirligi binosi oldida yuz bergan teraktga munosabat bildirdi. Bu haqda Anadolu xabar berdi.
Erdo‘g‘on Turkiya Buyuk Millat Majlisi (parlamenti)ning kuzgi sessiyasining ochilishidagi nutqida gapirdi. Prezident ushbu teraktga urinish xavfsizlik choralari tufayli muvaffaqiyatli bartaraf etilganini taʼkidladi.
“Turkiyada tinchlik va xavfsizlikni buzishga urinayotgan terroristlar hech qachon maqsadlariga erisha olmaydi”, — dedi Erdo‘g‘on.
U voqeani “terrorchilarning so‘nggi nafasi” deb atab, Turkiyada terrorchi tashkilotlarning “qayta tug‘ilishi” mumkin emasligini aytdi.
Anqaradagi IIV binosi oldida xudkush o‘zini portlatdi
Anqarada ikki terrorchi Turkiya Ichki ishlar vazirligining darvozasida portlash uyushtirdi. Voqea 1-oktyabr kuni mahalliy vaqt bilan taxminan 09:30 da sodir bo‘lgan. Terrorchilardan biri o‘zini portlatib yuborgan, ikkinchisi esa zararsizlantirilgan. Ikki politsiyachi yengil tan jarohati olgan.
Prezident o‘z nutqida Turkiya va Yevropa Ittifoqi o‘rtasidagi munosabatlar mavzusiga ham to‘xtalgan. Turkiya davlat rahbari Bryusselni Anqaraga nisbatan nokonstruktiv pozitsiyasidan voz kechishga chaqirgan.
“Agar Yevropa Ittifoqi birinchi navbatda viza masalasida adolatsiz pozitsiyasidan voz kechsa, xatolarini tuzatadi. Aks holda, u bizdan nimadir kutish huquqidan mahrum bo‘ladi”, — dedi Erdo‘g‘on.
Izoh (0)