Erdo‘g‘on: “Turkiya tez orada o‘zining havo mudofaa tizimlarini sotishni boshlaydi”

Turkiya tez orada havo mudofaa tizimlarini boshqa mamlakatlardan sotib olish o‘rniga o‘zinikini sotishni boshlaydi.

Bu haqda Turkiya prezidenti Rajab Toyyib Erdo‘g‘on Anqaradagi harbiy akademiyadagi chiqishida ma’lum qildi.

“Biz avvalroq o‘zimizning Siper havo hujumidan mudofaa tizimini muvaffaqiyatli sinovdan o‘tkazgan edik. Biz tez orada bu tizimlarni bizga turli bahonalar bilan sotmaganlarga sotadigan davlatga aylanamiz”, — dedi u.

 

 

Turkiya prezidenti bu gapi bilan Amerika Qo‘shma Shtatlarini nazarda tutgani xabar qilinmoqda. Sababi Turkiya AQSHning Patriot tizimlarini sotib olish bo‘yicha uzoq muzokaralar o‘tkazgan, ammo natijaga erisha olmagandi.

Siper (turkcha “xandaq” degani) — har qanday havo nishonlarini yo‘q qilish uchun mo‘ljallangan uzoq masofali zenit-raketa tizimi.

"Mudofaa sanoatimiz mamlakatimizni yuqori bosqichga olib chiqdi. Joriy yil oxiriga qadar biz mahalliy Kaan qiruvchi samolyotining birinchi parvozini ham ko‘ramiz. Biz Bayraktar Kizilelma dronlari sinovlarini yakunlab, uni armiyamizga topshirmoqchimiz”, — dedi Erdo‘g‘on.

Shuningdek, u “Turkiya kuchli va zamonaviy armiyaga ega bo‘lishdan bosh torta olmaydi”, — deb qo‘shimcha qildi.