Rossiya Engels aviabazasida Tu-95MS strategik bombardimonchi samolyotlarining siluetlarini chizmoqda. Bu haqda sun’iy yo‘ldosh tasvirlariga tayanib, The War Zone xabar berdi.

Engels aviabazasi Ukraina Qurolli kuchlari tomonidan o‘tgan yil davomida takroriy hujumga uchradi. Shundan so‘ng Rossiya samolyotlarini Ukraina dronlaridan himoya qilish uchun ularni avtomobil shinalari bilan qoplagandi. 

29-sentyabrdagi sun’iy yo‘ldosh tasvirlari esa aviabazada real ko‘rinishdagi samolyotlar chizilganini ko‘rsatmoqda. Soxta Tu-95 samolyotlari yanada real ko‘rinishga ega bo‘lishi uchun ruslar hatto shinalarni ham bo‘yagan. Aviatexnikalarni bunday ko‘rinishga keltirishdan maqsadlardan biri sun’iy yo‘ldoshlarni aldashga urinish bo‘lishi mumkin.

“Ammo bu aniq ishlamaydi, chunki tijorat sun‘iy yo‘ldoshlaridan olingan cheklangan yuqori aniqlikdagi tasvirlar ham samolyot siluetlarini haqiqiydan aniq ajrata oladi. Sintetik diafragma radar texnologiyasi kabi bir qator boshqa razvedka manbalaridan foydalanib, nishon uch o‘lchamli obyekt emasligini aniqlash mumkin”, — deyiladi xabarda.

Ikkinchidan, samolyotlar dron operatorlarini chalkashtirib yuborish va haqiqiy samolyotga zarba berishning oldini olish umidida chizilgan bo‘lishi ilgari surilmoqda.