AQSHda koronavirusga qarshi vaksinalar narxi keskin oshdi. AQSH Kasalliklarni nazorat qilish va oldini olish markazlari (CDC) Pfizer va Moderna vaksinalarining ikki dozasi uchun 80 dollardan ko‘proq to‘lamoqda. Bu haqda Newsweek xabar berdi.
Qayd etilishicha, 2020-yilning yozida CDC Pfizer vaksinasini bir dozasi uchun 19,50 dollar, Moderna vaksinasini esa 15,25 dollarga sotib olgan. O‘shanda CDC har ikkala vaksinadan 100 million dozadan xarid qilgan.
2022-yil yozida CDC Moderna vaksinasining 66 million dozasini har bir doza uchun 26,36 dollarga va Pfizer vaksinasining 105 million dozasini 30,48 dollarga sotib oldi. Hozir ular yana qimmatlashdi.
Nashrning ta’kidlashicha, yozda Sog‘liqni saqlash va aholiga xizmat ko‘rsatish bo‘yicha kotib Ksavye Beserra Moderna va Pfizer kompaniyalariga maktub yo‘llab, dorini “maqbul narxda” baholashni so‘ragan.
Shu bilan birga, Moderna o‘zining COVID-19 vaksinasi narxini har bir doza uchun 110-130 dollargacha oshirishni ko‘rib chiqayotgani xabar qilingan.
Bundan oldin Bayden ma’muriyati endi koronavirusga qarshi vaksinalarni sotib olish uchun federal mablag‘lar ishlatilmasligini aytdi. Ular tijorat asosida sotib olinadi.
Eslatib o‘tamiz, 5-may kuni Jahon sog‘liqni saqlash tashkiloti COVID-19 pandemiyasi tugaganini eʼlon qildi.