O‘zbekistonda dam olish kunlari kuzatiladigan ob-havo e’lon qilindi

Oktyabr oyining boshi O‘zbekistonda quruq va issiq bo‘ladi, deb xabar bermoqda “O‘zgidromet”.

Ma’lum qilinishicha, 29-sentyabr va dam olish kunlari O‘zbekiston hududining katta qismida quruq va iliq ob-havo saqlanib turadi. Faqat Toshkent viloyati va Farg‘ona vodiysi viloyatlarining ayrim joylarida 30-sentyabrda biroz yomg‘ir yog‘ishi mumkin. Harorat asosan kechalari 10-15 daraja, kunduz kunlari 23-28 daraja bo‘ladi.

29—30-sentyabr kunlari respublikaning ba’zi joylarida shamol tezligi 13-18 metr/sekundgacha kuchayishi, ayrim joylarda chang-to‘zon bilan kuzatilishi mumkin.

Toshkentda havo biroz bulutli bo‘ladi, vaqti-vaqti bilan o‘zgarib turadi, yog‘ingarchilik kutilmaydi, faqat 30-sentyabr, shanba kuni kechasi va ertalab biroz yomg‘ir yog‘ishi mumkin. Shamol asosan sharqdan 3-8 metr/sekund tezlikda esadi, 30 sentyabrda 10-12 metr/sekundgacha kuchayadi. Harorat kechasi 12-15 daraja, kunduzi 23-26 daraja bo‘ladi.