Bu yilning oktyabr oyi ham quruq va biroz iliq ob-havo bilan boshlanadi, deb xabar bermoqda “O‘zgidromet”.
Qayd etilishicha, oyning birinchi haftasida asosan yog‘ingarchiliksiz ob-havo bo‘lishi kutilmoqda. Kechasi va ertalab havo harorati 11-16 daraja atrofida bo‘lgan salqinlik his etiladi. Kunduz kunlari quyosh nurlari havoni 23-28 darajagacha, janubda baʼzi joylarda 30 darajagacha isitadi.
Keyinchalik oyning oxirigacha respublika hududi bo‘yicha harorat kechalari 10-15 daraja iliqdan 3-8 daraja iliqqacha, kunduz kunlari 23-28 darajadan 13-18 darajagacha o‘zgarib turishi kutilmoqda. Qoraqalpog‘iston Respublikasi, Xorazm viloyatida va Navoiy viloyatining shimolida oyning ikkinchi yarmida kechasi va ertalab havoda kuzgi sovuq va tuproqda 0-3 daraja sovuq kuzatilishi mumkin. Bunday harorat oktyabr oyining iqlimiy meʼyoriga yaqindir.
Oktyabr oyida yomg‘irlar birinchi o‘n kunlikning oxirida, shuningdek ikkinchi va uchinchi o‘n kunliklarning ayrim kunlarida kutilmoqda.
“Iqlimiy meʼyorlarga ko‘ra, O‘zbekiston hududining katta qismida yog‘ingarchilik oktyabr oyida 4 kundan 8 kungacha, respublikaning eng chekka janubida 1 kundan 3 kungacha kuzatiladi. Yog‘ingarchilik asosan yomg‘ir ko‘rinishida bo‘ladi, ammo havoda keskin sovuq kuzatilganda yomg‘ir qisqa muddatga qorga aylanishi istisno qilinmaydi”, — deb ta’kidlanadi “O‘zgidromet” prognozida.
Tungi havo haroratining o‘rtacha ko‘p yillik qiymati 6-11daraja iliqni tashkil etadi, lekin ko‘pincha oktabrda, ayniqsa oyning ikkinchi yarmida birinchi kuzgi sovuqlar kuzatiladi. Oktyabr oyida kunduzgi harorat odatda 23-28 daraja iliqdan 10-15 daraja iliqqacha o‘zgarib turadi.
“Albatta, tabiat o‘z tuzatishlarini amalga oshiradi va baʼzida haroratning yoki yog‘ingarchilikning haqiqiy qiymatlari ko‘p yillik davr qiymatlaridan sezilarli darajada farq qilishi mumkin”, — deyiladi xabarda.
Xususan, so‘nggi 30 yil ichida O‘zbekistonning barcha hududi bo‘yicha 2015-yilning oktabr oyi eng yomg‘ir ko‘p yog‘gan yil bo‘ldi. Ushbu yilda Toshkentda oktyabr oyida yog‘ingarchilik miqdori meʼyoridan 3,5-marta ko‘p bo‘ldi, bunda ikki kunda 45 mm yog‘ingarchilik bo‘ldi, bu oktyabr oyining oylik meʼyoridan 2-marta ko‘pdir.
Izoh (0)