“Inson huquqlari bo‘yicha milliy institutlar faoliyatini takomillashtirish munosabati bilan O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi qonun loyihasi muhokamaga qo‘yildi.
Jinoyat-protsessual kodeksiga kiritilishi rejalashtirilayotgan normaga ko‘ra, sudning qonuniy kuchga kirgan hukmi va ajrimi BMTning inson huquqlari bo‘yicha ustav organlari va shartnomaviy qo‘mitalarining O‘zbekiston yurisdiksiyasidagi shaxsning tegishli xabarnomasi asosida qabul qilgan qaroriga muvofiq bekor qilinishi hamda ish yuritish qaytadan boshlanishi mumkin. Bunday qaror yangi ochilgan holatlar ro‘yxatiga kiritiladi.
Maʼlumot uchun, bugungi kunda yangi ochilgan holatlar quyidagilardan iborat:
- jabrlanuvchining yoki guvohning bila turib yolg‘on ko‘rsatma yoxud ekspertning bila turib yolg‘on xulosa berganligi, xuddi shuningdek ashyoviy dalillar, tergov va sud harakatlari bayonnomalarining hamda boshqa hujjatlarning soxta ekanligi yoki bila turib noto‘g‘ri tarjima qilinganligi qonunga xilof, asossiz yoki adolatsiz hukm, qonunga xilof yoki asossiz ajrim chiqarilishiga sabab bo‘lganligi sudning qonuniy kuchga kirgan hukmi bilan aniqlanganligi;
- surishtiruvchining, tergovchining yoki prokurorning jinoiy xatti-harakatlari;
- sudyaning jinoiy xatti-harakatlari;
- o‘z holicha yoki ilgari aniqlangan holatlar bilan birgalikda mahkumning aybsizligidan yoxud u hukm etilganiga nisbatan og‘irligi darajasi bo‘yicha boshqa jinoyat sodir etganligidan yoxud oqlangan shaxsning yoki o‘ziga nisbatan ish tugatilgan shaxsning aybdorligidan dalolat beradigan boshqa holatlar.
Xuddi shu mazmundagi normalar Fuqarolik protsesessual kodeksi hamda Maʼmuriy sud ishlarini yuritish to‘g‘risidagi kodeksga kiritlmoqda.
Shuningdek, inson huquqlari sohasidagi majburiyatlarni nazorat qilish uchun Oliy Majlis palatalarining Parlament komissiyasi tashkil etilishi belgilanmoqda. Loyiha o‘zgartirilishi, to‘ldirilishi yoki rad etilishi mumkin.
Nyu-York shahrida o‘tayotgan BMT Bosh Assambleyasi 78-sessiyasining umumiy munozaralari doirasida Shavkat Mirziyoyev tashkilot Bosh kotibi Antoniu Guterrish bilan uchrashuv o‘tkazgandi. Uchrashuvda bosh kotib yangi “O‘zbekiston – 2030” islohotlar strategiyasiga kiritilgan maqsad va vaziflarning ko‘lamdorligini, ular Barqaror rivojlanish maqsadlari bilan to‘liq hamohangligini alohida qayd etgan edi.
Izoh (0)