O‘zbekistonda 2023-yilning yanvar—avgust oylari davomida 1415 nafar fuqaro yo‘l-transport hodisasi oqibatida vafot etdi. Bu haqda Senatning navbatdagi yalpi majlisida Mudofaa va xavfsizlik masalalari qo‘mitasi raisi o‘rinbosari, senator Tolibjon Madumarov maʼlum qildi.
Madumarovga ko‘ra, o‘tgan sakkiz oyida mamlakatda 9 milliondan ortiq yo‘l harakati qoidabuzarligi qayd etilgan. Bularning
- 8 millionga yaqin qo‘pol qoidabuzarliklar,
- 26 mingga yaqin transport vositasini mast holda boshqarish,
- 161 mingdan ortiq piyodalar qoidabuzarligi bilan bog‘liq.
Oqibatda ushbu davrda 5772 ta yo‘l-transport hodisasi sodir etilib, ulardan 5448 nafar fuqaro jarohatlangan, 1415 nafar fuqaro halok bo‘lgan. Oliy Majlis Senatining bundan oldingi yalpi majlisida Mudofaa va xavfsizlik masalalari qo‘mitasi raisi Qutbitdin Burxonov mamlakatda yetti oy davomida kuzatilgan YTHlar oqibatida 1 115 kishi halok bo‘lgani, 4 ming 564 nafari turli tan jarohatlari olganini ma’lum qilgandi. Bundan kelib chiqadiki, avgust oyining o‘zida 300 kishi YTH qurboniga aylangan.
Tolibjon Madumarovning maʼlum qilishicha, respublika bo‘ylab taxminan 11 mingga yaqin piyodalar o‘tish joyi mavjud bo‘lib, ularning 1834 tasida svetofor yoki piyodalarning xavfsizligini taʼminlovchi boshqa yo‘l belgilari qo‘yilgan.
“Bu umumiy raqamning 30 foizini ham tashkil etmaydi. Aksariyat tartibga solinmagan piyodalar o‘tish joylarida haydovchilarni mazkur obyekt to‘g‘risida o‘z vaqtida ogohlantiruvchi belgilar o‘rnatilmagan va yo‘l chiziqlari chizilmagan”, — deydi senator.
Uning taʼkidlashicha, tartibga solinmagan piyodalar o‘tish joylarida sutkaning qorong‘i vaqtida tegishli sunʼiy yoritish chiroqlari bilan taʼminlanmagani bois YTHning aksariyati kechki paytga to‘g‘ri kelmoqda. Tahlillarga ko‘ra, 2021−2023-yillar davomida tartibga solinmagan piyodalar o‘tish joylarida 2784 YTH sodir etilgan bo‘lsa, ularning 1007 tasi sutkaning qorong‘i vaqtida sodir etilgan.
“Haydovchilar tomonidan tartibga solinmagan piyodalar o‘tish joylarida piyodalarga yo‘l bermaslik ham YTHlarni ko‘payishiga sabab bo‘lyapti. Bunday holatlar yildan yilga ortib bormoqda”, — deya qayd etadi senator.
Izoh (0)