Ўзбекистонда август ойида ЙТҲлар оқибатида 300 киши ҳалок бўлди

Ўзбекистонда 2023 йилнинг январь—август ойлари давомида 1415 нафар фуқаро йўл-транспорт ҳодисаси оқибатида вафот этди. Бу ҳақда Сенатнинг навбатдаги ялпи мажлисида Мудофаа ва хавфсизлик масалалари қўмитаси раиси ўринбосари, сенатор Толибжон Мадумаров маълум қилди.

Мадумаровга кўра, ўтган саккиз ойида мамлакатда 9 миллиондан ортиқ йўл ҳаракати қоидабузарлиги қайд этилган. Буларнинг

• 8 миллионга яқин қўпол қоидабузарликлар,
• 26 мингга яқин транспорт воситасини маст ҳолда бошқариш,
• 161 мингдан ортиқ пиёдалар қоидабузарлиги билан боғлиқ. 

Оқибатда ушбу даврда 5772 та йўл-транспорт ҳодисаси содир этилиб, улардан 5448 нафар фуқаро жароҳатланган, 1415 нафар фуқаро ҳалок бўлган. Олий Мажлис Сенатининг бундан олдинги ялпи мажлисида Мудофаа ва хавфсизлик масалалари қўмитаси раиси Қутбитдин Бурхонов мамлакатда етти ой давомида кузатилган ЙТҲлар оқибатида 1 115 киши ҳалок бўлгани, 4 минг 564 нафари турли тан жароҳатлари олганини маълум қилганди. Бундан келиб чиқадики, август ойининг ўзида 300 киши ЙТҲ қурбонига айланган.

Толибжон Мадумаровнинг маълум қилишича, республика бўйлаб тахминан 11 мингга яқин пиёдалар ўтиш жойи мавжуд бўлиб, уларнинг 1834 тасида светофор ёки пиёдаларнинг хавфсизлигини таъминловчи бошқа йўл белгилари қўйилган.

“Бу умумий рақамнинг 30 фоизини ҳам ташкил этмайди. Аксарият тартибга солинмаган пиёдалар ўтиш жойларида ҳайдовчиларни мазкур объект тўғрисида ўз вақтида огоҳлантирувчи белгилар ўрнатилмаган ва йўл чизиқлари чизилмаган”, — дейди сенатор.

Унинг таъкидлашича, тартибга солинмаган пиёдалар ўтиш жойларида сутканинг қоронғи вақтида тегишли сунъий ёритиш чироқлари билан таъминланмагани боис ЙТҲнинг аксарияти кечки пайтга тўғри келмоқда. Таҳлилларга кўра, 2021−2023 йиллар давомида тартибга солинмаган пиёдалар ўтиш жойларида 2784 ЙТҲ содир этилган бўлса, уларнинг 1007 таси сутканинг қоронғи вақтида содир этилган.

“Ҳайдовчилар томонидан тартибга солинмаган пиёдалар ўтиш жойларида пиёдаларга йўл бермаслик ҳам ЙТҲларни кўпайишига сабаб бўляпти. Бундай ҳолатлар йилдан йилга ортиб бормоқда”, — дея қайд этади сенатор.