O‘zbekistonda 2023-yilning o‘tgan yetti oyda 4 772 ta YTH qayd etilgan. Bu haqda IIV Jamoat xavfsizligi departamenti Yo‘l harakati xavfsizligi xizmati maʼlumotlarida keltirilgan.
Yo‘l-transport hodisalarining kelib chiqish sabablarini tahlil qilgan Oliy Majlis Senatining Mudofaa va xavfsizlik masalalari qo‘mitasi raisi Qutbitdin Burxonovga ko‘ra, ushbu YTHlar oqibatida 1 115 kishi halok bo‘lgan, 4 ming 564 nafari turli tan jarohatlari olgan.
YTHlarning 2 453 tasi yoki 51,4 foizi subyektiv sabablarga ko‘ra sodir etilgan, yaʼni haydovchilar yo‘l harakati qoidalariga eʼtibor bermasligi oqibatida kelib chiqqan.
“Yo‘l-transport hodisalarida halok bo‘lganlarning 1 078 nafari yoki 96,7 foizi xavfsizlik kamarini taqmagan. Soha mutaxassislarining fikricha, agar orqada o‘tirgan yo‘lovchilar xavfsizlik kamarini taqqan bo‘lganida oldingi o‘rindiqlarda o‘tirgan yo‘lovchilarning ko‘pchiligi avtohalokatda omon qolishi mumkin edi. Ularning so‘zlariga ko‘ra, agar orqadagi yo‘lovchilar kamar taqmagan bo‘lsa, YTH vaqtida oldingi o‘rindiqda o‘tirgan yo‘lovchining halok bo‘lish ehtimoli besh barobar ortadi”, — deydi Qutbitdin Burxonov.
Toshkentda yetti oyda 675 ta yo‘l-transport hodisasi qayd etilgan. Hodisa oqibatida 71 kishi halok bo‘lgan, 787 kishi turli tan jarohatlari olgan. Baxtsiz hodisalarning eng keng tarqalgan sababi tezlikni oshirish bo‘lgan — 199 ta holat. Haydovchilar tomonidan 90 ta holatda taqiqlovchi svetofor ishorasiga eʼtibor bermaslik, mast holatda haydovchilar ishtirokida 8 ta YTH sodir etilgan.
“Xulosa qilib aytganda, yo‘l harakati qatnashchilarining huquqiy madaniyatini oshirishda nafaqat ichki ishlar organlari xodimlari, balki taʼlim tizimi, fuqarolik jamiyati institutlari va jamoat tashkilotlari vakillari muhim rol o‘ynashi zarurligiga eʼtibor qaratish lozim”, — deydi Qutbitdin Burxonov.
Izoh (0)