Қонун лойиҳаси билан Қонунчилик палатаси ва Сенатга ўзини ўзи тарқатиб юбориш ваколати берилаётгани ҳақида хабар берилган эди. Олий Мажлис Қонунчилик палатаси спикери ўринбосари Одилжон Тожиев бу парламент сайлови муддатидан илгари ўтказилишини англатмаслигини билдирди.
Куни кеча Олий Мажлис палаталари фаолиятига тааллуқли қонун лойиҳаси кенг жамоатчилик ўртасида турли саволлар, хусусан, парламент сайлови муддатига оид ва бошқа мазмундаги саволлар пайдо бўлишига сабаб бўлди. Одилжон Тожиев бу борадаги саволларга жавоб берди.
Унинг қайд этишича, мазкур қонун лойиҳаси билан 14 та қонун (жумладан, Сайлов кодекси)га ўзгартириш ва қўшимчалар киритилиши кутилмоқда. Хўш, бунга қандай зарурат бор эди?
“Конституциямизга парламент палаталарининг ваколатлари ва ҳуқуқларига оид янги нормалар киритилган эди, лекин бу нормалар тегишли қонун ва қонуности ҳужжатларда мавжуд эмас. Бу борадаги бўшлиқни тўлдириш мақсадида бир гуруҳ депутатлар ўзлари ташаббус кўрсатиб, мазкур қонун лойиҳасини ишлаб чиқишди ва палатага киритишди.
“Қонун лойиҳасида ушбу ваколатнинг белгиланаётгани жорий йилда муддатидан илгари парламент сайлови бўлиб ўтишини англатмайди. Қонун лойиҳаси эндигина масъул қўмита ва фракциялар йиғилишларида концептуал жиҳатдан кўриб чиқилди”, — дейди Қонунчилик палатаси спикери ўринбосари.
Бундан ташқари, қонун лойиҳалари масъул қўмита, фракциялар, умуман ялпи мажлисда камида яна икки босқичли муҳокамалардан ўтади ва Сенатга маъқуллаш учун юборилади. Сенат маъқуллагач эса, президент имзолайди ва кучга киради.
“Қонун ижодкорлигининг ўзига хос жиҳатларига бирма-бир тўхталганимнинг сабаби шундаки, токи бу қонун лойиҳаси парламент палаталари ва президент томонидан қабул қилиниб, кучга киргунига қадар бўлган оралиқ вақт қисқа эмас, бу эса жорий йилда муддатидан илгари парламент сайлови бўлиб ўтиши мумкинлиги ҳақидаги “башорат”лар ҳақиқатга тўғри келмаслигини яна бир исботлайди”, — дейди Одилжон Тожиев.
27-сентябр куни бўлиб ўтган ялпи мажлисда ушбу қонун лойиҳаси биринчи ўқишда кўрилиб, депутатлар томонидан қабул қилинди. Одилжон Тожиевнинг таъкидлашича, энди қонун лойиҳаси матни жамоатчиликнинг таклиф ва мулоҳазаларини олиш учун Қонунчилик палатасининг сайтига жойлаштирилади. Жамоатчилик муҳокамасидаги таклифлар, фикрлар асосида қонун лойиҳаси такомиллаштирилади.
Изоҳ (0)