Fransiyaning Nigerdagi elchisi Silven Itte 27-sentabr, chorshanba kuni Afrika mamlakatini tark etdi. Bu haqda France24 xabar bermoqda.
Fransiyalik diplomati Niameydan Chad poytaxti Njamenaga uchib ketdi, u yerdan Parijga safarini davom ettiradi.
Fransiya prezidenti Emmanuel Makron Nigerdagi harbiy to‘ntarishdan so‘ng elchixonada fransuz diplomati va bir necha xodimlar uy qamog‘ida saqlanayotgani, ularga oziq-ovqat yetkazishga ruxsat berilmayotgani haqida ma’lum qilgandi.
Nigerdagi isyonchi harbiylar avgust oyi oxirida Fransiya elchisini persona non grata deb e’lon qildi. O‘shandan beri diplomatik missiya rahbari va uning jamoasidagi olti kishi nigeriyalik harbiylar tomonidan qattiq nazorat ostida yashadi.
Nigerdagi harbiylar hokimiyatini tan olmagan Fransiya hukumati avvaliga o‘z elchisini mamlakatda qoldirishni talab qildi. 24-sentabr kuni Makron elchi yaqin orada Fransiyaga qaytishini ma’lum qildi. Prezident shuningdek, yil oxirigacha mamlakatdagi 1500 nafar fransuz askari Nigerni tark etishini aytdi.
Nigerdagi harbiy isyon
Eslatib o‘tamiz, 26-iyul kuni Niger prezident gvardiyasining bir qismi davlat rahbari Muhammad Bazumga qarshi bosh ko‘tardi va uni hokimiyatdan chetlatdi. Niger qurolli kuchlari bosh shtabi qo‘zg‘olon uyushtirgan jangchilarni qo‘llab-quvvatladi. General Abdurahmon Tchiani yangi rahbar deb e’lon qilindi.
G‘arbiy Afrika davlatlari iqtisodiy hamjamiyati (ECOWAS), Yevropa Ittifoqi, Fransiya va boshqa bir qator davlatlar harbiy to‘ntarishni qoralab, Bazumni ozod qilishni va uning prezidentlik lavozimiga qaytarilishini talab qildi.
Izoh (0)