Fransiya Nigerdan 2023-yil oxirigacha o‘z qo‘shinlarini olib chiqib ketadi. Bu haqda Fransiya prezidenti Emmanuel Makron ma’lum qildi.
“Biz Nigerdagi harbiy hamkorlikni tugatmoqdamiz. U yerda joylashgan askarlar ham yil oxirigacha qaytadi”, — dedi davlat rahbari va “Barxan” operatsiyasi (Fransiya qo‘shinlarining Saheldagi jangari guruhlarga qarshi operatsiyasi) “muvaffaqiyatli” o‘tganini qo‘shimcha qildi.
Makron fransuz armiyasini olib chiqib ketish “uyushgan holda” amalga oshirilishiga vaʼda berdi hamda Fransiya elchisini Nigerdan chaqirib olish qarorini eʼlon qildi.
Le Parision nashriga ko‘ra, Nigerda deyarli 1500 nafar fransiyalik askar bor.
Nigerda harbiy isyon
Nigerda 26-iyul kuni davlat to‘ntarishi sodir bo‘ldi. Hokimiyatni prezident gvardiyasidan bir guruh harbiylar egallab oldi, keyinroq qurolli kuchlar qo‘mondonligi isyonchilarga qo‘shildi. Ular o‘zlarini vatanni qutqarish milliy kengashi deb atadi. Yangi hokimiyat ag‘darilgan prezident Muhammad Bazumni davlatga xiyonat va davlat xavfsizligiga putur yetkazishda ayblab sud qilishga qaror qildi va agar tashqi kuchlar aralashsa, uni o‘ldirish bilan tahdid qildi.
G‘arb davlatlari, jumladan, Fransiya (Niger uning sobiq mustamlakasi), BMT, Afrika Ittifoqi (qit’aning 55 ta davlatini birlashtiradi) hamda ECOWAS (15 ta G‘arbiy Afrika davlatini o‘z ichiga oladi) isyonni qoraladi. ECOWAS a’zolari Nigerga harbiy aralashuvga tayyorligini e’lon qildi. Assotsiatsiya aralashuv sanasini kelishib oldi, ammo buni oshkor qilmadi. Makron ECOWAS’ni harbiy harakatlar boshlash qarorida qo‘llab-quvvatlashini aytdi. U, shuningdek, prezident Bazum so‘ramaguncha, qo‘shinlar va elchilarni olib chiqmaslikka va’da berdi.
Izoh (0)