Франциянинг Нигердаги элчиси Силвен Итте 27 сентябрь, чоршанба куни Африка мамлакатини тарк этди. Бу ҳақда France24 хабар бермоқда.
Франциялик дипломати Ниамейдан Чад пойтахти Нжаменага учиб кетди, у ердан Парижга сафарини давом эттиради.
Франция президенти Эммануэл Макрон Нигердаги ҳарбий тўнтаришдан сўнг элчихонада француз дипломати ва бир неча ходимлар уй қамоғида сақланаётгани, уларга озиқ-овқат етказишга рухсат берилмаётгани ҳақида маълум қилганди.
Нигердаги исёнчи ҳарбийлар август ойи охирида Франция элчисини персона нон грата деб эълон қилди. Ўшандан бери дипломатик миссия раҳбари ва унинг жамоасидаги олти киши нигериялик ҳарбийлар томонидан қаттиқ назорат остида яшади.
Нигердаги ҳарбийлар ҳокимиятини тан олмаган Франция ҳукумати аввалига ўз элчисини мамлакатда қолдиришни талаб қилди. 24 сентябрь куни Макрон элчи яқин орада Францияга қайтишини маълум қилди. Президент шунингдек, йил охиригача мамлакатдаги 1500 нафар француз аскари Нигерни тарк этишини айтди.
Нигердаги ҳарбий исён
Эслатиб ўтамиз, 26 июль куни Нигер президент гвардиясининг бир қисми давлат раҳбари Муҳаммад Базумга қарши бош кўтарди ва уни ҳокимиятдан четлатди. Нигер қуролли кучлари бош штаби қўзғолон уюштирган жангчиларни қўллаб-қувватлади. Генерал Абдураҳмон Тчиани янги раҳбар деб эълон қилинди.
Ғарбий Африка давлатлари иқтисодий ҳамжамияти (ECOWAS), Европа Иттифоқи, Франция ва бошқа бир қатор давлатлар ҳарбий тўнтаришни қоралаб, Базумни озод қилишни ва унинг президентлик лавозимига қайтарилишини талаб қилди.
Изоҳ (0)