BMT missiyasi juma kuni Nigerda hokimiyat tepasiga kelgan harbiylar bilan uchrashdi, deb xabar berdi shanba kuni RFI radiostansiyasi.
Avvalroq BMT Bosh kotibining rasmiy vakili Stefan Dyujarrik BMTning G‘arbiy Afrika va Sahel bo‘yicha maxsus vakili Leonardo Santos Simao hokimiyatni egallab olgan harbiylar bilan muammoni hal qilishni muhokama qilish uchun Nigerga borganini ma’lum qilgandi.
“Bizdagi maʼlumotlarga ko‘ra, isyonchilar tomonidan tayinlangan bosh vazir mudofaa vaziri va ichki ishlar vaziri hamrohligida o‘z kabinetida BMT vakillarini qabul qilgan”, — deyiladi xabarda.
Uzoq davom etgan uchrashuvda isyonchilar Nigerga nisbatan joriy qilingan iqtisodiy sanksiyalarni “noqonuniy va g‘ayriinsoniy” deya qoralagan. Shuningdek, ular BMT rasmiylariga lavozimidan tushirilgan prezident Muhammad Bazumning ahvoli yaxshi ekani, hozirda u zarur oziq-ovqat olayotganini aytishgan.
Qo‘zg‘olonchilar xalqaro ommaviy axborot vositalarini bu borada dezinformatsiya tarqatishda ham aybladilar, deya ta’kidlaydi radiostansiya.
Izoh (0)