AQSH prezidenti Jo Bayden 26-sentyabr kuni Michigan shtatining Detroyt shahridagi General Motors zavodida ish tashlash piketiga qo‘shildi. U ovoz kuchaytirgich orqali piketchilarni taslim bo‘lmaslikka chaqirdi, deb xabar bermoqda AP.
United Auto Workers (UAW) kasaba uyushmasining kepkasini kiygan Bayden General Motors ehtiyot qismlari omborida uyushma vakillari tomonidan uyushtirilgan norozilik namoyishiga qo‘shilgan: zavodga tegishli obyektlarda 12 kundan buyon ish tashlash davom etmoqda.
Uzoq muddatli ish tashlash iqtisodga putur yetkazishi mumkin degan xavotirlarga qaramay, prezident avtomobil shirkatining daromadi oshgani sababli ishchilarni ish haqini oshirish uchun kurashni davom ettirishga chaqirdi.
“Mamlakatni Uoll Strit qurmagan, mamlakatni o‘rta sinf vakillari qurgan, o‘rta sinfni esa kasaba uyushmalari qurgan. Qani davom etamiz. Siz shu paytgacha olgan maoshingizdan ko‘prog‘iga loyiqsiz”, — dedi Bayden o‘z chaqirig‘ida.
U ishchilarning maoshini 40 foizga oshirish haqidagi chaqiriqlarni qo‘llab-quvvatladi.
Qayd etilishicha, Bayden yaqinlashib kelayotgan saylovlarda kasaba uyushmalarining qo‘llab-quvvatlovini olish uchun piketda qatnashgan birinchi zamonaviy prezident bo‘ldi.
Bugun sobiq prezident Donald Tramp ham namoyishchilar bilan uchrashishni rejalashtirmoqda. U Oq uy rahbarining Detroytga tashrifini “firibgar Jo Baydenning Amerika xalqining e’tiborini butun mamlakat bo‘ylab iqtisodiy notinchlikka olib kelgan halokatli ‘Baydenomika’ siyosatidan chalg‘itish uchun qilgan piaridan boshqa narsa emas” deb atadi.
Izoh (0)