O‘zbek shou-biznesining taniqli vakillaridan biri bo‘lgan Rayhon G‘aniyeva 16-sentabr kuni 45 yoshni qarshiladi. Ijodda omadi kulgan xonanda hayotda ko‘plab qiyin kunlarni boshdan kechirgan. Xo‘sh, ijodkorni nimalar qiynagan, shaxsiy hayotidagi zarbalar unga qanday ta’sir etgan? Quyida shu haqda so‘z yuritiladi.
1978-yilning 16-sentabrida Toshkentda tavallud topgan Rayhon G‘aniyeva uchun san’at olami begona emas. Uning otasi ham, katta bobosi ham san’atning eng ko‘zga ko‘ringan vakillari bo‘lishgan.
Xonandaning katta bobosi Nabi G‘aniyev o‘z davrining mashhur aktyor va rejissori bo‘lgan. U o‘zbek kino san’atining nodir durdona filmlari: “Nasriddin Buxoroda” (1943), “Tohir va Zuhra” (1945), “Nasriddinning sarguzashtlari” (1946) va “Farg‘ona qizi” (1948) kabilarni suratga olgan. Uning to‘rt farzandi bo‘lib, ularning birortasi san’atkor bo‘lishni istamaydi. Faqatgina o‘g‘li Hotamning farzandi Otabek G‘aniyev bobosining kasbini davom ettiradi.
Otabek G‘aniyev 1977-yili aktrisa Tamara Shakirova bilan oila quradi. Ikki ijodkorning muhabbatidan qo‘ng‘iroq sochli qizaloq Rayhon dunyoga keladi. Avvaliga hammasi yaxshi edi. Otabek G‘aniyev eng yaxshi rollarni ijro etayotgan paytda baxtsiz hodisaga uchrab, vafot etadi. O‘shanda Rayhon G‘aniyeva 6 yoshli qizaloq edi. Oila boshining erta vafoti yaqinlariga oson kechmagani aniq.
Tamara Shokirova bor e’tiborini ijodga qaratadi, nafaqat o‘zbek, balki ozarbayjon va hind kinoijodkorlari bilan ham hamkorlikni yo‘lga qo‘yadi. 1993-yilgacha o‘ndan ortiq filmlarda suratga tushib, so‘ng ikkinchi bor oila quradi. Bu nikohidan yana bir qiz farzandli bo‘ladi va unga Nasiba deb ism qo‘yadi.
— Bilasizmi, ko‘pchilik bolalik eng baxtli davr deydi. Ammo men o‘zimning bolaligim haqida bunday deyolmayman. Chunki bolaligim baxtli va quvonchli bo‘lmagan. Shuning uchun ham u kunlarni eslashni istamayman. Lekin 12 yasharligimda oyim menga kuchukcha sovg‘a qilgani bugungacha yodimda. Uzoq vaqt orzu qilgan narsamga ega bo‘lganimdan rosa xursand bo‘lgandim, — deydi xonanda intervyularining birida.
Xonanda ilk yoshidayoq filmda suratga tushgan. U 1980-yili “O‘zbekfilm” kinostudiyasi tomonidan suratga olingan “Leningradlik bolalarim” filmida Hadichaning farzandi rolini ijro etgan. Hadicha rolini esa onasi Tamara Shokirova ijro etgan.
Rayhon san’atkorlar oilasida tug‘ilgan bo‘lishiga qaramay, onasi uning bu kasbni egallashiga jiddiy qarshilik ko‘rsatadi.
— Onam avvaliga san’atkor bo‘lishimni istamagan. Nega bunday qilganini aniq bilmayman. Ammo keyinchalik o‘zi qo‘llab-quvvatladi. Ammo san’atga bo‘lgan qiziqishim, xohishim barcha qiyinchiliklarni yengib o‘tishimga kuch bergandi, — deydi xonanda intervyularining birida.
O‘zbekiston Davlat jahon tillari universitetining ingliz filologiyasi fakultetini tamomlagan Rayhon G‘aniyeva 1999-yili professional ijodga qadam qo‘yadi. U ilk bor 2000-yili suratga olingan “Tohir va Zuhra” musiqali filmidagi qo‘shig‘i bilan odamlar tiliga tushadi. O‘sha davrlarda xonandalar bugungidek ko‘p bo‘lmagan. Shu sabab ham Rayhonning qo‘shiqlari zamonaviy yoshlar orasida tez ommalashgan va xonanda 2002-yilda ilk yakkaxon konsert dasturini taqdim etishga muvaffaq bo‘lgan. Omad kelsa, birvarakayiga keladi, deganlaridek, xonanda 2002-yilda “Nihol” mukofoti sovrindoriga aylandi.
Ammo odamlar orasida “Rayhon G‘aniyeva oqqon, saraton ekan. Shu bois unga ketma-ket mukofot topshirishyapti”, degan gap-so‘zlar ham tarqaladi. Ammo xonanda bu kabi mish-mishlarga e’tibor bermay, ijod qiladi. Ketma-ket yaratilgan hit qo‘shiqlar “Yilning eng yaxshi ayol xonandasi”, “Yil qo‘shig‘i”, “Yilning eng yaxshi albomi” mukofotlarini qo‘lga kiritishiga sabab bo‘ladi.
Rayhon G‘aniyeva ijodining eng gullagan davrlari 2005—2010-yillarga to‘g‘ri keladi. O‘sha yillarda yaratilgan qo‘shiqlar esa hamon muxlislar tilidan tushmay kelyapti. “Yodingdami?”, “Kechir”, “Orzungga ishon”, “Doimo”, “Baka-baka bang” kabi qo‘shiqlari tinglovchilar tilidan tiliga o‘tib kelmoqda. Xonandaning har yilgi konsert dasturini esa muxlislar intiqlik bilan kutardi. U o‘zbek xonandalari ichida shou-konsertlar taqdim etishda, yangilikka qo‘l urishda hamon peshqadam bo‘lib kelmoqda.
Rayhon G‘aniyeva ijodi davomida o‘zini aktrisalikda ham sinab ko‘rdi. U ishtirok etgan “Kechir” filmini tomoshabinlar iliq kutib olgan. U mazkur filmning ssenariysini o‘zi yozgan va kartinada shou-biznes olamidagi illatlarni ochib berishga harakat qilgan.
— “Kechir” filmidan keyin kino sohasiga qo‘l urmaslikka qaror qilganman. Juda qiyin va uzoq vaqt sarflanadigan ish ekan. O‘sha paytda filmlarga ham takliflar juda ko‘p bo‘lgan. Vaqtim tig‘izligi uchun barchasini rad etganman, — deydi xonanda intervyularining birida.
2012-yil Rayhon G‘aniyeva uchun ham qayg‘uli, ham quvonchli keldi. U 2012-yilning fevral oyida volidasi Tamara Shokirovani yo‘qotdi. Aktrisa og‘ir xastalik sabab olamdan ko‘z yumdi. Ko‘p o‘tmay, noyabr oyida xonanda o‘z baxtini topdi. 34 yoshida Rayhon aktyor Yigitali Mamajonovga turmushga chiqdi. Biroq ularning turmushi uzoqqa cho‘zilmadi. Rayhon ikki egizakning onasi bo‘lgach, Yigitali Mamajonov bilan ajrashdi.
— Erim uchun o‘z vaqtida ovqatini tayyorladim, kiyimlarini dazmolladim, kirini yuvdim… Uyimni sarishtali va shinam tutdim. Ko‘p ayollar kabi erimdan qancha pul topayotganini so‘ramadim, — degandi xonanda Rayhon.
Xonandaning so‘zlariga ko‘ra, u “nima bo‘lishidan qat’i nazar” Yigitalini tushunishga, undan ayb izlamaslikka harakat qilgan. “Yoshimizdagi farq 12 yil. Men ham uning yoshidagi davrimni ko‘z oldimga keltirib, to‘g‘ri va adolatli munosabatda bo‘lishga intildim, — degandi Rayhon.
Rayhon aynan nima sababdan Yigitali Mamajonov bilan ajrashayotganini ma’lum qilmagan, faqat turmushida “juda murakkab vaziyat yuzaga kelgani” sabab ajrashishga qaror qilganini aytgan.
Rayhon G‘aniyeva farzandli bo‘lishni uzoq vaqt orziqib kutgan. 2014-yili bir emas, ikkita o‘g‘il farzandlarni dunyoga keltirdi. O‘sha paytda bolalarni otasidan ajratish unga ham oson kechmagani aniq.
Farzandlarim otasini so‘raydi, albatta. Ular tez-tez ko‘rishib turadi. Bundan tashqari, men o‘zim Yigitalidan ular bilan tez-tez ko‘rishishini, muloqot qilishini so‘rayman. Har doim farzandlarimni otasini hurmat qilishga, sevishga o‘rgataman, chunki u o‘g‘illarimning otasi.
O‘g‘illarim hozirgi turmush o‘rtog‘im bilan ham do‘stona munosabatda. O‘z o‘rnida, men ham turmush o‘rtog‘imning farzandlari bilan yaxshi munosabatdaman, ular bilan do‘st tutinganman, — degandi xonanda intervyusida.
Xonanda 2015-yili rasman ajrashdi va oradan bir yil o‘tib, turmushga chiqayotgani haqida xabarlar tarqaldi. U boshlovchi Farhod Alimov bilan oila qurdi. Faqatgina navbatdagi to‘y boshqacha bo‘ldi. Xonanda to‘yi avvalgidek dabdaba bilan o‘tishini istamadi. Ammo Farhod Alimovning uchta farzandi borligini bilgan ba’zi negativchilar xonandani oilabuzarlikda ayblashdi.
— Rayhonni oila qurmasdan avval ham yaxshi tanirdim. Chunki ikkimiz ham shou-biznesda faoliyat yuritamiz. Rayhon bilan oila qurmasimizdan ancha yil avval ajrashgandim. Sobiq turmush o‘rtog‘im bilan do‘stona munosabatda edik, ammo er-xotin sifatida bir-birimizni tushunmaganmiz. Farzandlarimni yaxshi ko‘raman, ular bilan haftasiga 2-3 bor birga bo‘lamiz, — degandi Farhod Alimov negativchilarga qarata.
— Men birovning oilasini buzmayman va oilalar mustahkam bo‘lishi tarafdoriman. Hamma inson baxtli bo‘lishga haqli, — degandi Rayhon G‘aniyeva intervyularining birida.
Farhod Alimov bilan qurilgan oila uzoqqa bormaydi, deb hisoblaganlar ham bo‘lgan. Ammo Rayhon otani bolalaridan ajratmaydigan inson ekanligini isbotlay oldi. U turmush o‘rtog‘ining farzandlarini oilaviy safarlarga olib boradi. Suratlarni ijtimoiy tarmoqlardagi sahifalariga joylashni ham kanda qilmaydi.
Rayhon o‘zbek shou-biznesidagi eng tartibli xonandalardan biri. U kunini to‘g‘ri taqsimlashni va ortiqcha insonlarga vaqt sarflashni yomon ko‘radi.
— Eng sevimli mashg‘ulotim farzandlarim bilan birga bo‘lish. Men bolalarim bilan birga bo‘lsam dam olaman, — deydi xonanda intervyularining birida.
Ayni kunda badavlat o‘zbek xonandasining hayoti ana shunday rang-barangliklarga boy. Qisqa qilib aytganda, u ham yulduz bo‘lib tug‘ilmagan va osonlikcha bugungi kunlarga yetgan emas.
Izoh (0)