9—10-oktabr kunlari “Xalqlar do‘stligi” san’at saroyida “Kosmos” kulgi jamoasi o‘zining ilk yakkaxon konsert dasturini taqdim etadi. Xo‘sh, tayyorgarlik jarayonlari qanday kechyapti? Davron Kabulov nima maqsadda yangi jamoani tuzishga qaror qilgandi? Aktyorlar qanday tanlanadi va ular Davron Kabulovning “qora ro‘yxat”iga tushmasligi uchun nimalarga e’tibor berishi kerak. Shu kabi savollarga “Kosmos” jamoasining bosh prodyuseri Davron Kabulov javob berdi.

— 2019-yili “Garaj” nomli teleloyihani tashkil etgandik. Loyiha davomida iqtidori va ijobiy qirralarini namoyon qilgan olti nafar ishtirokchini saralab olgandik. Afsuski, ko‘p o‘tmay ularning ikki nafari bilan xayrlashishimizga to‘g‘ri keldi. Bu jamoa aslida “Million”ning antraktlarini to‘ldirish uchun tashkil etilgandi. Bundan tashqari, avlodlar almashinuvini ta’minlash, yosh iste’dod egalariga yordam berishni ham niyat qilganmiz. Shu bois 2021-yildan boshlab “Kosmos” yigitlari “Million”ning konsertlarida ishtirok etishni boshlashdi. Ular ancha oldin konsert berishga tayyor edi. Ammo bolani suvga qo‘yishdan avval unga suzishni o‘rgatish kerak. Uch yil davomida ular katta sahnada tajriba orttirdi va o‘z muxlislariga ega bo‘ldi. Turgan gapki, ilk konsertdan foyda olish qiyin. Ammo konsert muvaffaqiyatli o‘tishiga ko‘zim yetadi, — deydi Davron Kabulov.

Davron Kabulov trenddagi har qanday mavzuni sahnaga olib chiqib bo‘lmasligi va “ming so‘m” so‘ragan bolakayning san’at saroyiga chiqqanidan ranjigani haqida aytib o‘tdi.

— Bunda Nodirbek Hayitovning aybi yo‘q, uning atrofidagi insonlar, xususan, konsert prodyuseri bu haqda o‘ylashi kerak edi. Nodirbek Hayitov ijodning ichida, u ko‘p narsa haqida o‘ylaydi va kezi kelganda nima to‘g‘ri, nima noto‘g‘ri ekanligini anglamay qolishi tabiiy hol. Bu xuddi do‘kondan parfyum olayotganda ikki yoki uchinchi atirni hidlagandan keyin ularni ajratolmay qolgandek gap. Atrofdagi odamlar unga maslahat berishi va o‘rni kelganida “stop” qilish kerakligini aytishlari kerak edi. Trenddagi mavzularni olib chiqqan yaxshi, ammo bu o‘sha odamning o‘zini sahnaga olib chiqish kerak degani emas. Qo‘pol bo‘lsa-da aytaman, u bolakay sahnada ishtonini yechib yuborsa, nima qila olishardi?! Shular haqida ham o‘ylab ko‘rish kerak, — deydi Davron Kabulov.

“Million” jamoasining Rossiyadagi gastrol safarlari chog‘ida aktrisa Nilufar Hamidovaning sahna libosi ko‘plab tanqidlarga sabab bo‘lgandi. Xo‘sh, sahnani qadrlaydigan Davron Kabulov nega “Million”ning gastrol safarida aktrisaning ochiq-sochiq libosda sahnaga chiqishiga ijozat berdi?

— Opa Rossiyaga borgandan keyin bizga “syurpriz” ko‘rsatdi? Sahnaga chiqqunga qadar bu libosi haqida bilmagandik. Chunki jamoaning har bir a’zosi Toshkentdagi konsertda kiygan kiyimlari bilan sahnaga chiqdi. Opa Toshkentdagi konsertda butunlay boshqa libosni kiygan, Rossiyada “Bu xorij-ku”, dedi kulib. U opa mendan 10 yoshda katta, kirar aqli kirib, chiqadigani chiqib bo‘lgan. Ikkimizning me’yorlarimiz o‘rtasida katta farq bor ekan. Bu holatda sahnaga chiqishiga mendan tashqari boshqa yigitlar, xususan, Mirkomil Musayev ham qarshi bo‘ldi. Masalaning ikkinchi tomoni ham bor. Bu sahna ko‘rinishi orqali ochiq-sochiq kiyinadigan qiz-ayollar tanqid ostiga olingan. Ya’ni biz uni o‘rnak qilib ko‘rsatganimiz yo‘q, aksincha Nilufar opa orqali ana shunday qiz-ayollarning yuziga ko‘zgu tutdik. Keyin yana bir masala, biz bunday chiqishni qoralaymizmi bitta qonunni yo‘lga qo‘yish kerak. Ya’ni o‘zbek san’atkoriga qo‘yilayotgan taqiq “Xalqlar do‘stligi”da konsert berayotgan Filipp Kirkorovning raqqosasiga ham qo‘llanishi kerak. Chunki tomoshabin bitta, ya’ni xorijlik san’atkorning Toshkentdagi konsertiga o‘zbek muxlisi boradi. Bunga mumkin emas, unga bo‘laveradi degan qaror adolatli emas, — deydi Davron Kabulov.

Suhbatni to‘liq holda tomosha qilishingiz mumkin.