Gollivud yulduzi Silvestr Stallonening to‘ng‘ich qizi Sofiya otasiga yoshlarning trendi haqida ma’lumot berishga qaror qildi va u bilan TikTok’da video suratga oldi. Ushbu video ijtimoiy tarmoqlarda keng muhokama qilinmoqda.

Videoda ota va qizning Tears For Fears guruhining Everybody wants to rule the world (“Hamma dunyoni boshqarishni istaydi”) qo‘shig‘iga raqs tushayotgani ko‘rsatilgan. Kadr yakunida Gollivud aktyori qizini parda bilan o‘rab oladi va o‘zi raqs tushishda davom etadi.

Ma’lumot uchun, Silvestr Stallone rafiqasi Jennifer Flavin bilan o‘n yillik munosabatlardan so‘ng 1997-yilda turmush qurgan. Juftlikning Sofiya, Sistin va Skarlett ismli qizlari bor. O‘tgan yozda ommaviy axborot vositalari Silvestr va Flavinning 25 yillik turmushdan keyin ajrashayotgani haqida yoza boshladi. Biroq vaqt o‘tib ular bir-birlari orasidagi barcha tushunmovchiliklarni hal qilishga muvaffaq bo‘ldi.

Aktyor model bilan oila qurishidan oldin ikki marta uylangan. Uning aktrisa Sasha Zak bilan turmushidan ikki nafar: Seyj va Serjio ismli o‘g‘illari bor. U 1985-yilda Sasha bilan ajrashganidan so‘ng, ko‘p o‘tmay model va aktrisa Brigitta Nilsenga uylandi. Ularning nikohi ikki yil davom etdi.