O‘zbekistonda 2025-yildan boshlab sertifikatga ega bo‘lmagan mutaxassislarga ko‘p kvartirali uylarning boshqarish organlariga rahbarlik qilish taqiqlanadi. Bu haqda Qurilish va uy-joy kommunal xo‘jaligi vazirligi axborot xizmati rahbari Saidnosir Usmonov ma’lum qildi.
Uning bildirishicha, Vazirlar Mahkamasining 2023-yil 11-sentabrda qabul qilingan “Shaharsozlik va uy-joy kommunal xo‘jaligi sohalari mutaxassislarini sertifikatlash tizimini joriy etish to‘g‘risida”gi qarori bilan 2023-yil 1-oktabrdan boshlab, buyurtmachi xizmatlarining loyiha boshqaruvi va texnik nazorat mutaxassislari, loyiha tashkilotlarining mualliflik nazorati mutaxassislari, loyiha bosh muhandislari va bosh arxitektorlari, pudrat tashkilotlarining ichki nazorat mutaxassislarini o‘qitish va sertifikatlash yo‘lga qo‘yiladi.
Keyingi yildan boshlab esa, ekspertiza organlari ekspertlari, nazorat o‘lchovi mutaxassislari, ko‘p kvartirali uylarni boshqarish organlari rahbarlari, viloyat va tuman (shahar) arxitektorlari hamda hududiy nazorat inspeksiyalari inspektorlari malakasini oshirish va sertifikatlash tizimi joriy etiladi.
Shuningdek, shaharsozlik va uy-joy kommunal xo‘jaligi sohalarida mutaxassislarni sertifikatlash tartibi to‘g‘risidagi nizom tasdiqlandi.
Xususan, bunda soha mutaxassislariga sertifikat berish, test sinovi jarayonini o‘tkazish, sertifikat berilgan mutaxassislar reyestrini yuritish va sertifikatning amal qilishini to‘xtatish tartiblari belgilangan.
Yangicha tartibga ko‘ra:
- soha mutaxassislarini o‘qitish va sertifikatlash jarayonlarini tashkil etish Qurilish va uy-joy kommunal xo‘jaligi vazirligi huzuridagi Kompetensiyani rivojlantirish instituti tomonidan tegishli dasturlar asosida tashkil etiladi;
- sertifikatlar tegishli dasturlar bo‘yicha o‘quv kursini tugatib, Bilim va malakalarni baholash agentligi tomonidan o‘tkaziladigan test sinovlarini muvaffaqiyatli yakunlagan mutaxassislarga beriladi;
- mutaxassis test sinovidan muvaffaqiyatli o‘tkandan so‘ng “Shaffof qurilish” milliy axborot tizimidan QR-kod qo‘yilgan sertifikat yuklab olinadi.
2025-yildan boshlab sertifikatga ega bo‘lmagan mutaxassislarga yuqori toifali qurilish obyektlari bo‘yicha shaharsozlik faoliyati bilan shug‘ullanish, shuningdek, ko‘p kvartirali uylarning boshqarish organlariga rahbarlik qilish taqiqlandi.
Izoh (0)